अंबड ( प्रतिनिधी विष्णू गायकवाड ) : तालुक्यातील महाकाळा परिसरात अवकाळी पावसादरम्यान घडलेल्या दुर्दैवी घटनेत दोन तरुणांचा जागीच मृत्यू झाला असून एक जण गंभीर जखमी झाला आहे. ही घटना महाकाळा ते साष्ट पिंपळगाव रोडवरील नाथनगर वस्ती येथे घडली असून संपूर्ण परिसरात शोककळा पसरली आहे.
मिळालेल्या माहितीनुसार, सोमवारी दुपारनंतर अचानक वातावरणात बदल होऊन जोरदार वाऱ्यासह विजांचा कडकडाट सुरू झाला. पावसापासून बचाव करण्यासाठी महाकाळा येथील काही तरुण नाथनगर वस्ती जवळील लिंबाच्या झाडाखाली थांबले होते. याचवेळी अचानक त्या झाडावर वीज कोसळली. या भीषण घटनेत गोविंद प्रल्हाद लहाने (वय 21 वर्ष) आणि आदित्य दगडू बेद्रे (वय 20 वर्ष) हे दोघे तरुण जागीच ठार झाले.
या दुर्घटनेत आणखी एक तरुण गंभीररित्या भाजला असून त्याला तातडीने उपचारासाठी रुग्णालयात दाखल करण्यात आले आहे. त्याची प्रकृती चिंताजनक असल्याचे समजते.
घटनेची माहिती मिळताच स्थानिक नागरिकांनी तातडीने घटनास्थळी धाव घेतली. तसेच पोलिस आणि महसूल प्रशासनालाही कळविण्यात आले. अधिकाऱ्यांनी घटनास्थळी भेट देऊन पंचनामा केला असून पुढील कार्यवाही सुरू आहे.
या दुर्दैवी घटनेमुळे महाकाळा गावावर शोककळा पसरली असून परिसरात हळहळ व्यक्त केली जात आहे. दोन्ही तरुणांच्या अकाली निधनामुळे त्यांच्या कुटुंबांवर दुःखाचा डोंगर कोसळला आहे.
दरम्यान, अशा प्रकारच्या घटनांमुळे अवकाळी पावसादरम्यान झाडाखाली आश्रय घेणे टाळावे, असे आवाहन प्रशासनाकडून करण्यात येत आहे. तसेच मृतांच्या कुटुंबियांना शासनाकडून तात्काळ मदत मिळावी, अशी मागणी नागरिकांकडून करण्यात येत आहे.
