दौंड (प्रतिनिधी संघराज गायकवाड) – दौंड शहरातील गोपाळवाडी रोड येथे प्रमुख आरोग्यसेवा केंद्र असलेल्या महालक्ष्मी हॉस्पिटल समोरील रस्त्यावर पार्किंगचा प्रश्न अधिकच गंभीर झाला आहे. रस्ता अवघ्या २० फुटांचा असूनही दोन्ही बाजूंनी बेशिस्त गाड्या उभ्या केल्याने रस्त्यावरून जाणाऱ्या नागरिकांना व रुग्णवाहिकांना मोठा त्रास सहन करावा लागत आहे.
या रस्त्यावर खाजगी गाड्या, रिक्षा, दुचाकी तसेच एमआयडीसीच्या मोठ्या बसेस यांची अतिक्रमणासारखी गर्दी झाली आहे. काही वेळा रुग्णांना हॉस्पिटलपर्यंत पोहोचवणेही कठीण होऊन बसते. विशेषतः आपत्कालीन रुग्णांसाठी ही परिस्थिती धोकादायक ठरू शकते.
स्थानिक रहिवासी राहुल आढाव म्हणाले, “दररोज याच मार्गावरून शाळकरी मुले, महिलावर्ग व रुग्ण ये-जा करतात. पण रस्त्यावरच उभ्या असलेल्या गाड्यांमुळे अपघाताची शक्यता वाढली आहे. पोलीस प्रशासनाने याकडे गांभीर्याने लक्ष दिले पाहिजे.”
नागरिकांची प्रमुख मागणी: या भागात ‘नो पार्किंग झोन’ घोषित करावा. वाहतूक पोलिसांनी नियमित पेट्रोलिंग करावे आणि नियम भंग करणाऱ्यांवर कठोर दंडात्मक कारवाई करावी.
या प्रश्नाकडे तात्काळ लक्ष देऊन उपाययोजना केल्या नाहीत, तर भविष्यात यामुळे गंभीर अपघात किंवा जीवितहानी होण्याची शक्यता नाकारता येत नाही.
