Times Of Maharshtra Desk : मुंबई व्हिसलिंग वुड्स इंटरनॅशनलच्या ‘कॅडन्स म्युझिक फेस्टिव्हल 2026’ मध्ये भारतीय संगीतविश्वातील दिग्गज कलाकार एकत्र येत आध्यात्मिक आणि सांस्कृतिक संगीताच्या वाढत्या प्रभावावर सखोल चर्चा झाली. Whistling Woods International आयोजित या महोत्सवात कैलाश खेर, सोनू निगम, सलीम मर्चंट, सुखविंदर सिंग, अमेय डबली, नवीन कुमार, आनंदन शिवमणी यांसह चित्रपट निर्माता सुभाष घई यांची उपस्थिती होती.
तीन दिवस चाललेल्या या महोत्सवात पारंपरिक आणि आधुनिक संगीताचा सुंदर संगम पाहायला मिळाला. आध्यात्मिक संगीत आजच्या सिनेमात पुन्हा लोकप्रिय होत असून ते प्रेक्षकांशी भावनिक नातं निर्माण करत असल्याचे या कार्यक्रमातून स्पष्ट झाले.
उद्घाटन सत्रात कैलाश खेर यांनी ‘कलाकाराने आपल्या कलेशी प्रामाणिक राहिले पाहिजे, तेव्हाच संगीताला आत्मा मिळतो,’ असे सांगत तरुणांना स्वतःची ओळख जपण्याचा संदेश दिला.
दुसऱ्या दिवशी सोनू निगम आणि सलीम मर्चंट यांनी भजन, कव्वालीसारख्या आध्यात्मिक संगीताच्या आधुनिक रूपावर चर्चा केली. ‘आध्यात्मिक संगीत माणसाला आशा देते आणि सर्व सीमा मिटवते,’ असे मत त्यांनी व्यक्त केले.
शेवटच्या दिवशी अमेय डबली यांनी आपल्या आयुष्याचा प्रवास सांगत प्रभावी सादरीकरण केले. तर सुखविंदर सिंग, आनंदन शिवमणी आणि नवीन कुमार यांच्या सादरीकरणाने महोत्सवाची सांगता रंगली.
महोत्सवाबद्दल सुभाष घई म्हणाले, परंपरा आणि नवकल्पना यांचा संगमच संगीताला कालातीत बनवतो. कॅडन्स 2026 मध्ये तरुणांनी आपल्या मुळांची नव्याने ओळख करून घेतली.
या महोत्सवात कार्यशाळा, स्पर्धा आणि चर्चासत्रांच्या माध्यमातून विद्यार्थ्यांना मोठ्या कलाकारांसमोर आपली कला सादर करण्याची संधी मिळाली.
एकंदरीत, ‘कॅडन्स 2026’ हा महोत्सव संगीत, संस्कृती आणि अध्यात्म यांचा संगम साधणारा ठरला.
