कारवाईचं आश्वासन… पण अजूनही कृती नाही! पुणे पोलीस भरतीतील ₹21 हजार वसुली प्रकरणात नेमकं चाललंय तरी काय?

पुणे पोलीस भरती प्रक्रियेत निवड झालेल्या विद्यार्थ्यांकडून कथितपणे ₹21 हजार रुपये उकळल्याचा मुद्दा टाईम्स ऑफ महाराष्ट्रने सातत्याने लावून धरला आहे. सुरुवातीला हा केवळ आरोप असल्याचे सांगितले जात होते. मात्र, विद्यार्थ्यांकडून पैसे मागितल्याचे स्क्रीनशॉट आणि इतर पुरावे समोर आल्यानंतर या प्रकरणाने गंभीर वळण घेतले.
या प्रकरणाची दखल घेत पुणे पोलीस आयुक्त अमितेश कुमार यांनी कारवाई करण्याचे आश्वासन दिले होते. संबंधित प्रकरणाची चौकशी करून दोषींवर योग्य ती कारवाई केली जाईल, असेही त्यांनी स्पष्ट केले होते. मात्र, त्या आश्वासनानंतर अनेक दिवस उलटूनही अद्याप कोणतीही ठोस कारवाई झालेली दिसून येत नाही.
यामुळे आता प्रश्न उपस्थित होत आहे की, नेमकं चाललंय तरी काय? पुरावे समोर आल्यानंतरही कारवाई का होत नाही? दोषींना पाठीशी घालण्याचा प्रयत्न सुरू आहे का? की चौकशी केवळ कागदोपत्रीच सुरू आहे?जर पोलीस आयुक्तांनी कारवाईचे आश्वासन दिले असेल, तर त्यानंतर प्रत्यक्षात कोणती पावले उचलली गेली, याबाबत अद्याप कोणतीही स्पष्ट माहिती समोर आलेली नाही. यासोबतच किट देण्यासाठी आया फाउंडेशनला परवानगी कोणी दिली होती? या फाउंडेशनचे अध्यक्ष योगेश जाधव यांच्याशी कोणी चर्चा केली होती? आया फाउंडेशन नेमके कशा प्रकारे काम करते? या प्रश्नांची उत्तरे देखील अनुत्तरीत आहेत. दरम्यान, टाईम्स ऑफ महाराष्ट्र हा विषय इथेच थांबवणार नाही. या प्रकरणाचा शेवटपर्यंत पाठपुरावा करत विद्यार्थ्यांना न्याय मिळवून देण्याचा प्रयत्न सुरू राहील. या प्रकरणाशी संबंधित कोणाकडे माहिती, पुरावे किंवा तक्रार असल्यास त्यांनी टाईम्स ऑफ महाराष्ट्रशी संपर्क साधावा. या प्रकरणातील प्रत्येक अपडेट आम्ही तुमच्यापर्यंत पोहोचवत राहू.