निफाड (प्रतिनिधी उत्तम जाधव) : तालुक्यातील देवगाव परिसरात सर्पदंशामुळे एका शेतकऱ्याचा दुर्दैवी मृत्यू झाल्याची घटना ७ एप्रिल रोजी सकाळी घडली असून परिसरात हळहळ व्यक्त केली जात आहे.
मिळालेल्या माहितीनुसार, देवगाव येथील महादेव नगर परिसरात राहणारे प्रशांत एल.जी. सोनवणे (वय ५३) हे आज सकाळी सुमारे ८ वाजण्याच्या सुमारास आपल्या शेतात गवत कापत होते. यावेळी त्यांच्या उजव्या पायाच्या अंगठ्याजवळ अचानक सर्पदंश झाला. घटनेनंतर कुटुंबीयांनी तातडीने त्यांना उपचारासाठी लासलगाव येथील ग्रामीण रुग्णालयात दाखल केले.
मात्र, उपचारादरम्यान सकाळी सुमारे ११ वाजण्याच्या सुमारास वैद्यकीय अधिकारी डॉ. अमोल राठोड यांनी तपासणी करून त्यांना मृत घोषित केले. या घटनेमुळे सोनवणे कुटुंबावर दुःखाचा डोंगर कोसळला आहे.
या प्रकरणी लासलगाव पोलीस ठाण्यात अकस्मात मृत्यूची नोंद करण्यात आली असून सहायक पोलीस निरीक्षक दीपक पाटील यांच्या मार्गदर्शनाखाली पोलीस हवालदार संदीप शिंदे पुढील तपास करत आहेत.
दरम्यान, या दुर्दैवी घटनेमुळे देवगाव परिसरात शोककळा पसरली असून शेतकऱ्यांनी शेतात काम करताना अधिक काळजी घेण्याचे आवाहन करण्यात येत आहे.
