गणेश नारंग, पिंपरी चिंचवड प्रतिनिधी: पिंपरी चिंचवड महानगरपालिका प्रभाग क्रमांक २१ मधील महिलांसाठी एक मोठी सांस्कृतिक मेजवानी आयोजित करण्यात आली आहे. समाजकार्यात सक्रिय असलेल्या कुणाल दिलीप साठे यांच्या वतीने रविवार, २३ नोव्हेंबर २०२५ रोजी पिंपरीगावात खेळ रंगला पैठणीचा हा विशेष मेगा-इव्हेंट आयोजित केला जाणार आहे. विविध उपक्रमांच्या माध्यमातून महिलांचा सामाजिक सहभाग वाढविण्यावर भर देणाऱ्या या कार्यक्रमाबद्दल प्रभाग २१ (पिंपरीगाव, वैभवनगर, मिलिंदनगर) मधील महिलांमध्ये प्रचंड उत्सुकता निर्माण झाली आहे.
हा कार्यक्रम महिलांसाठी दर्जेदार मनोरंजन, परंपरागत खेळ आणि उपयुक्त बक्षिसांचा संगम असणार आहे. यामध्ये सहभागी होणाऱ्या सर्व महिलांसाठी मेगा लकी ड्रॉ ची सोय करण्यात आली आहे. ज्यात स्कूटी, फ्रीज, एलईडी टीव्ही, वॉशिंग मशीन, शिवण मशीन यांसारख्या विविध आकर्षक वस्तूंचा समावेश आहे. याव्यतिरिक्त, कार्यक्रमाची शोभा वाढवण्यासाठी प्रसिद्ध गायक अवधूत गांधी यांचा सुरेल लाईव्ह संगीत कार्यक्रम देखील सादर होणार आहे. ज्यामुळे महिलांना एकाच छताखाली मैत्री आणि सांस्कृतिक वातावरणाचा अनुभव घेता येईल.
आयोजक कुणाल साठे यांनी या उपक्रमामागील आपला उद्देश स्पष्ट केला. “या कार्यक्रमाचा मुख्य उद्देश प्रभागातील महिलांना एकत्र आणणे, त्यांना आनंदाचे वातावरण देणे आणि समुदायभावना अधिक मजबूत करणे हा आहे. महिलांचा सहभाग आणि उत्साह पाहून आम्हाला नेहमीच प्रेरणा मिळते,” असे साठे यांनी सांगितले. महिलांना सक्रिय व्यासपीठ उपलब्ध करून देणारा हा उपक्रम सामाजिक बांधिलकीचे दर्शन घडवणारा आणि वार्षिक उपक्रमांमध्ये विशेष ठरणारा आहे.
हा भव्य कार्यक्रम रविवार, २३ नोव्हेंबर २०२५ रोजी सायंकाळी ५ वाजता नवं महाराष्ट्र विद्यालय मैदान, पिंपरीगाव येथे होणार आहे. प्रभाग क्रमांक २१ मधील पिंपरीगाव, वैभवनगर, मिलिंदनगर, अशोक टॉकीज परिसर आणि पिंपरी कॅम्प येथील सर्व महिला भगिनींना या आनंदाच्या मेजवानीत मोठ्या संख्येने सहभागी होण्याचे आवाहन आयोजकांकडून करण्यात आले आहे.
