Times of Maharashtra Desk, Pune: पुणे शहरात हत्येचे सत्र सुरूच असून, गुन्हेगारीच्या वाढत्या घटनांमुळे कायदा आणि सुव्यवस्थेचा प्रश्न पुन्हा ऐरणीवर आला आहे. काही दिवसांपूर्वी बाजीराव रस्त्यावर झालेल्या हत्येची घटना ताजी असतानाच, आता सिंहगड कॉलेज परिसरात एका तरुणाची निर्घृण हत्या करण्यात आल्याची धक्कादायक घटना समोर आली आहे.
मिळालेल्या माहितीनुसार, मृत तरुणाचे नाव सय्यद असून त्याचे वय अंदाजे २० ते २२ वर्षे असल्याची प्राथमिक माहिती आहे. सिंहगड कॉलेज परिसरातील एका इमारतीजवळ ही घटना घडली. आरोपीने सय्यद याच्यावर हल्ला करताना कोयता आणि कुंड्याचा वापर केला आणि अत्यंत क्रूरपणे त्याची हत्या केली. त्यानंतर आरोपीने मृतदेह परिसरात टाकून घटनास्थळावरून पळ काढला.
पोलिसांचा तपास सुरू
या घटनेची माहिती मिळताच पोलिसांनी तात्काळ घटनास्थळी धाव घेतली. पंचनामा केल्यानंतर पोलिसांनी मृतदेह ताब्यात घेऊन शवविच्छेदनासाठी रुग्णालयात पाठवला आहे. या प्रकरणी गुन्हा दाखल करण्याची प्रक्रिया सुरू असून, पोलीस आरोपीचा शोध घेत आहेत.
शहरात वाढत्या गुन्हेगारीमुळे भीतीचे वातावरण
गेल्या काही दिवसांत पुण्यात खूनांच्या घटनांमध्ये लक्षणीय वाढ झाली आहे. भरदिवसा बाजीराव रस्त्यावर मयांक खराडे नामक तरुणाची कोयत्याने वार करून हत्या करण्यात आली होती. अशा लागोपाठच्या घटनांमुळे पुणेकरांमध्ये भीतीचे वातावरण पसरले असून, नागरिकांच्या सुरक्षिततेवर गंभीर प्रश्नचिन्ह निर्माण झाले आहे.
