सिन्नर:(प्रतिनिधी नवनाथ आव्हाड) मराठा विद्या प्रसारक समाज, नाशिक संचलित लोकनेते शंकरराव बाळाजी वाजे विद्यालय, सिन्नर येथील विद्यार्थ्यांनी उच्च प्राथमिक शिष्यवृत्ती परीक्षेत उल्लेखनीय यश संपादन करत विद्यालयाच्या शैक्षणिक गुणवत्तेची परंपरा कायम राखली आहे. इयत्ता पाचवीतील १२ आणि इयत्ता सातवीतील १३ अशा एकूण २५ विद्यार्थ्यांनी शिष्यवृत्ती परीक्षेत यश मिळविल्याबद्दल विद्यालयात त्यांचा गौरव सोहळा उत्साहात पार पडला.
कार्यक्रमाच्या प्रारंभी मान्यवरांच्या हस्ते यशस्वी विद्यार्थ्यांना पुष्पगुच्छ, सन्मानचिन्ह आणि अभिनंदनपत्र देऊन गौरविण्यात आले. विद्यार्थ्यांच्या या यशामुळे विद्यालयात आनंदाचे वातावरण निर्माण झाले असून पालक, शिक्षक व विद्यार्थ्यांनी टाळ्यांच्या कडकडाटात त्यांचे अभिनंदन केले.
मुख्याध्यापक राम ढोली यांनी विद्यार्थ्यांचे अभिनंदन करत सातत्यपूर्ण अभ्यास, शिक्षकांचे समर्पित मार्गदर्शन आणि पालकांचे मोलाचे सहकार्य यामुळे हे यश शक्य झाल्याचे सांगितले. भविष्यातही अधिकाधिक विद्यार्थी विविध स्पर्धा परीक्षांमध्ये यश संपादन करून विद्यालयाचे नाव राज्यभर उज्ज्वल करतील, असा विश्वास त्यांनी व्यक्त केला.
तालुका संचालक कृष्णाजी भगत यांनी शिक्षकांचे परिश्रम, विशेष मार्गदर्शन वर्ग, नियमित सराव परीक्षा आणि पालकांच्या सहकार्याचे कौतुक केले. विद्यार्थ्यांनीही आपल्या यशाचे श्रेय शिक्षक आणि पालकांना दिले. पर्यवेक्षकांनी विद्यार्थ्यांना पुढील शैक्षणिक वाटचालीसाठी शुभेच्छा दिल्या.
या गौरव सोहळ्यास तालुका संचालक कृष्णाजी भगत, शालेय समिती सदस्य बबनरावजी ठोक गुरुजी, डॉ. विजय लोहारकार, अनंत उगले, गौरीताई गायकवाड, विशाखा समिती सदस्य मनीषा जाधव, मुख्याध्यापक राम ढोली, उपमुख्याध्यापिका मंगला हांडे, पर्यवेक्षक पांडुरंग करपे, विजयानंद कुमावत, सर्व शिक्षक, शिक्षकेतर कर्मचारी, पालक व विद्यार्थी मोठ्या संख्येने उपस्थित होते. कार्यक्रमाचे सूत्रसंचालन सुषमा थोरात यांनी केले, तर आभार प्रदर्शन पांडुरंग करपे यांनी केले. उपस्थितांनी यशस्वी विद्यार्थ्यांचे अभिनंदन करून त्यांच्या उज्ज्वल भवितव्यासाठी शुभेच्छा दिल्या.
