सिन्नर (प्रतिनिधी नवनाथ आव्हाड): तालुक्यातील सोनारी येथे लोकनेते अजितदादा पवार यांच्या जयंतीनिमित्त विविध विकासकामांचे भूमिपूजन व लोकार्पण सोहळा उत्साहात पार पडला. यावेळी माजी मंत्री तथा आमदार ॲड. माणिकराव कोकाटे यांनी अजितदादा पवार यांच्या कार्याचा गौरव करत, “अजितदादा हे केवळ महाराष्ट्राचे नव्हे तर देशाचे लोकनेते होते. लोकनेता म्हणून मिळालेली मान्यता त्यांच्या व्यक्तिमत्त्वालाच शोभून दिसते,” असे भावनिक उद्गार काढले.
कार्यक्रमास सिन्नरचे नगराध्यक्ष विठ्ठलराजे उगले, माजी जिल्हा परिषद सदस्य केरू पवार, जयराम शिंदे, माजी सरपंच किसनराव शिंदे, नंदू पाटील पवार यांच्यासह अनेक मान्यवर उपस्थित होते. कोकाटे यांनी आपल्या भाषणात अजितदादांच्या स्पष्टवक्तेपणा, तात्काळ निर्णयक्षमता, सामान्य जनतेच्या प्रश्नांप्रती असलेली बांधिलकी आणि दिलेला शब्द पाळण्याची वृत्ती यांचा विशेष उल्लेख केला. त्यांनी कार्यकर्त्यांना अजितदादांच्या नावापुढे “स्वर्गीय” ऐवजी “लोकनेते” हा शब्द वापरण्याचे आवाहनही केले.
जयंतीनिमित्त संपूर्ण आठवडाभर विविध उपक्रमांचे आयोजन करण्यात येणार असल्याचे सांगण्यात आले. आतापर्यंत तालुक्यातील शाळा व शासकीय कार्यालयांना अजितदादांच्या ३०० ते ३५० प्रतिमांचे वितरण करण्यात आले असून वृक्षारोपण उपक्रमही राबविण्यात येत असल्याची माहिती देण्यात आली. यावेळी आमदार कोकाटे यांनी आदर्श गाव दत्तक योजनेअंतर्गत सोनारी गाव दत्तक घेतल्याची घोषणा केली. ग्रामदैवत भैरवनाथ महाराज मंदिर बांधकाम, शिवस्मारक, जिल्हा परिषद शाळेच्या वर्गखोल्या, वैकुंठ रथाचे लोकार्पण तसेच विविध रस्ते व स्मशानभूमी सुशोभीकरणाच्या कामांचे भूमिपूजन करण्यात आले. कार्यक्रमास विविध विभागांचे अधिकारी, पदाधिकारी आणि ग्रामस्थ मोठ्या संख्येने उपस्थित होते.
