पुणे: शहरातील रस्त्यांच्या एकूण लांबीबाबत पुणे महानगरपालिकेच्या दोन विभागांकडून परस्परविरोधी आकडेवारी समोर आल्याने प्रशासनाच्या कामकाजावर गंभीर प्रश्नचिन्ह निर्माण झाले आहे. एका विभागाच्या नोंदीनुसार शहरात ६,८९२ किलोमीटर रस्ते असल्याचे सांगितले जात असताना, दुसरीकडे पथ विभागाच्या अधिकृत माहितीनुसार हीच लांबी २,३७९.६६ किलोमीटर इतकी असल्याचे स्पष्ट करण्यात आले आहे. या तब्बल ४,५२० किलोमीटरपेक्षा अधिकच्या तफावतीमुळे नागरिकांमध्ये संभ्रम निर्माण झाला आहे.
महापालिकेच्या घनकचरा व्यवस्थापन विभागाने शहरातील रस्त्यांची लांबी ६,८९२ किलोमीटर असल्याचे नमूद केले असून त्यानुसार साफसफाईसह विविध कामांचे नियोजन केले जात असल्याचा दावा आहे. मात्र, पथ विभागाने अधिकृत नोंदीत शहरातील रस्त्यांची लांबी केवळ २,३७९.६६ किलोमीटर असल्याचे सांगितले आहे. त्यामुळे कोणती आकडेवारी खरी, याबाबत प्रशासनाकडे स्पष्ट उत्तर नसल्याचे चित्र आहे.
रस्त्यांच्या लांबीतील या मोठ्या फरकामुळे साफसफाई, डांबरीकरण, देखभाल, निधीचे नियोजन तसेच विविध कंत्राटांच्या प्रक्रियेवर परिणाम होण्याची शक्यता व्यक्त केली जात आहे. नागरिकांच्या करातून होणाऱ्या खर्चाचे अचूक नियोजन करण्यासाठी वास्तव आकडेवारी आवश्यक असल्याचे तज्ज्ञांचे मत आहे.
या प्रकरणावर प्रशासनाने तातडीने स्पष्टीकरण देऊन सर्व विभागांमध्ये एकसमान आणि अद्ययावत माहिती उपलब्ध करून द्यावी, अशी मागणी नागरिकांकडून होत आहे. शहरातील रस्त्यांची प्रत्यक्ष मोजणी करून अधिकृत आकडेवारी जाहीर करण्याची आवश्यकता आता प्रकर्षाने जाणवत आहे.
पारदर्शक प्रशासनाचा दावा करणाऱ्या महापालिकेने या विसंगतीची चौकशी करून जबाबदारी निश्चित करावी, अशी अपेक्षा व्यक्त होत आहे. कारण रस्त्यांच्या लांबीतील हा केवळ आकड्यांचा गोंधळ नसून, त्याचा थेट संबंध शहरातील विकासकामे, सार्वजनिक निधीचा वापर आणि नागरिकांना मिळणाऱ्या मूलभूत सुविधांशी आहे.
