वरणगाव:(प्रतिनिधी विनोद पवार) जळगाव समाजकल्याण विभागात कनिष्ठ लिपिक म्हणून कार्यरत असलेल्या पूजा गोपाळ जवळकर (वय 29) यांनी राहत्या घरी गळफास घेऊन आत्महत्या केल्याची धक्कादायक घटना समोर आली आहे. या घटनेमुळे समाजकल्याण विभागासह वरणगाव परिसरात शोककळा पसरली असून आत्महत्येमागील नेमके कारण अद्याप स्पष्ट झालेले नाही. या प्रकरणाचा तपास वरणगाव पोलीस करीत आहेत.
मिळालेल्या माहितीनुसार, पूजा जवळकर या जळगाव येथील समाजकल्याण विभागात कनिष्ठ लिपिक म्हणून कार्यरत होत्या. त्या वरणगाव येथील मकरंद नगर परिसरात आपल्या दोन लहान मुलांसह वास्तव्यास होत्या. कौटुंबिक कारणांमुळे त्यांचा घटस्फोट झाला होता. त्यानंतर त्या मुलांच्या संगोपनाची जबाबदारी सांभाळत नोकरी करत होत्या.
बुधवारी (22 जुलै) रात्री सुमारे 10 वाजण्याच्या सुमारास त्यांच्या नातेवाईकांना या घटनेची माहिती मिळाली. तत्काळ घटनास्थळी धाव घेऊन त्यांना उपचारासाठी वरणगाव ग्रामीण रुग्णालयात दाखल करण्यात आले. मात्र वैद्यकीय अधिकाऱ्यांनी तपासणीअंती त्यांना मृत घोषित केले.
या घटनेनंतर वरणगाव पोलीस ठाण्यात अकस्मात मृत्यूची नोंद करण्यात आली आहे. आत्महत्येमागील कारणांचा शोध घेण्यासाठी पोलिसांकडून सर्व बाजूंनी तपास सुरू असून, कुटुंबीय व संबंधित व्यक्तींचे जबाब नोंदविण्याची प्रक्रिया सुरू आहे.
पूजा जवळकर यांच्या अकाली निधनामुळे समाजकल्याण विभागातील अधिकारी व कर्मचारी, तसेच वरणगाव परिसरात हळहळ व्यक्त करण्यात येत आहे. दोन लहान मुलांच्या डोक्यावरून आईचे छत्र हरपल्याने सर्वत्र दुःख व्यक्त होत आहे. पोलिसांच्या तपासानंतरच या दुर्दैवी घटनेमागील नेमके कारण स्पष्ट होणार आहे.
