विनोद पवार (जळगाव प्रतिनिधी ) : तालुक्यातील एका आदिवासीबहुल गावात सासरच्या मंडळींच्या कथित छळामुळे गर्भवती महिला व तिच्या दोन लहान मुलांचा संशयास्पद मृत्यू झाल्याची धक्कादायक घटना समोर आली असून, या घटनेमुळे संपूर्ण जिल्ह्यात खळबळ उडाली आहे.
पमिता डोंगरसिंग पावरा (वय २८) तसेच तिचा आठ वर्षांचा मुलगा विवेक आणि अवघ्या पंधरा दिवसांचे बाळ यांचे मृतदेह बुधवारी सकाळी सुमारे ११ वाजताच्या सुमारास त्यांच्या शेतातील विहिरीत तरंगताना आढळून आले. स्थानिक नागरिकांनी याबाबत पोलिसांना माहिती दिल्यानंतर पोलिसांनी घटनास्थळी धाव घेतली.
मृत महिलेचा भाऊ आकाश पावरा यांनी गंभीर आरोप करत सांगितले की, पमिता नुकतीच बाळंत झाली होती व प्रकृती अस्वस्थ असल्याने माहेरी आली होती. मात्र, दोन ते तीन दिवसांपूर्वी पती व सासरच्या मंडळींनी तिच्या प्रकृतीकडे दुर्लक्ष करत जबरदस्तीने तिला सासरी घेऊन गेले. त्यानंतर मंगळवारी पमिता दोन्ही मुलांसह बेपत्ता झाली होती.
बुधवारी मृतदेह सापडल्याची माहिती मिळताच नातेवाइकांनी मोठी गर्दी केली. मृतदेह शवविच्छेदनासाठी जिल्हा रुग्णालयात पाठवण्यात आले. शवविच्छेदन अहवालात पमिताच्या डोक्यावर गंभीर जखमा आढळून आल्याने मृत्यूबाबत संशय अधिक गडद झाला आहे.
पोलिसांनी या प्रकरणी संशयास्पद अकस्मात मृत्यूची नोंद घेतली असून सासरच्या छळाचा मुद्दा तपासाच्या केंद्रस्थानी आहे. घटनेचा सखोल तपास सुरू असून दोषींवर कठोर कारवाई केली जाईल, असे पोलिसांनी सांगितले आहे.
