Times Of Maharashtra : शिवसेना उद्धव बाळासाहेब ठाकरे पक्षाच्या महापालिकेतील गटनेतेपदी दिलीप ठाकूर यांची एकमताने निवड करण्यात आली आहे. या निवडीमुळे महापालिकेतील पक्षाच्या कामकाजाला अधिक बळ मिळणार असून संघटनात्मक दृष्टिकोनातूनही ही निवड महत्त्वाची मानली जात आहे.
गटनेता निवडीबाबतची अधिकृत प्रक्रिया पूर्ण करत शिवसेनेच्या नगरसेवकांच्या शिष्टमंडळाने विभागीय आयुक्त जितेंद्र पापळकर यांची भेट घेतली. यावेळी गटनेता निवडीचे अधिकृत पत्र विभागीय आयुक्तांकडे सादर करण्यात आले. या शिष्टमंडळात शिवसेनेचे महानगर प्रमुख डॉ. विवेक नावंदर यांच्यासह महापालिकेतील शिवसेनेचे सर्व नवनिर्वाचित नगरसेवक उपस्थित होते.
यावेळी बोलताना पक्षाच्या पदाधिकाऱ्यांनी दिलीप ठाकूर यांच्या अनुभवाचा आणि कार्यक्षम नेतृत्वाचा उल्लेख करत, त्यांच्या नेतृत्वाखाली महापालिकेत जनहिताचे प्रश्न प्रभावीपणे मांडले जातील, असा विश्वास व्यक्त केला. शहराच्या विकासाशी संबंधित प्रश्न, नागरी सुविधा, पाणीपुरवठा, रस्ते, स्वच्छता तसेच सामान्य नागरिकांच्या दैनंदिन समस्या महापालिकेत ठामपणे मांडल्या जातील, असेही यावेळी सांगण्यात आले.
गटनेतेपदी निवड झाल्यानंतर दिलीप ठाकूर यांनी पक्ष नेतृत्वाचे व सहकारी नगरसेवकांचे आभार मानले. पक्षाने माझ्यावर टाकलेली जबाबदारी प्रामाणिकपणे पार पाडेन. महापालिकेत नागरिकांच्या समस्या सोडवण्यासाठी, तसेच शहराच्या सर्वांगीण विकासासाठी कटिबद्ध राहणार आहे, असे त्यांनी यावेळी सांगितले.
या निवडीमुळे शिवसेना उद्धव बाळासाहेब ठाकरे पक्षाची महापालिकेतील भूमिका अधिक आक्रमक व लोकाभिमुख होईल, अशी अपेक्षा कार्यकर्त्यांकडून व्यक्त केली जात आहे.
