विनोद पवार ( जळगाव प्रतिनिधी ) : जामनेर तालुक्यातील हिंगणे बु. येथे भारतीय जनता पक्षाच्या वतीने “पंडित दीनदयाळ उपाध्याय प्रशिक्षण महाअभियान कार्यशाळा” उत्साहात पार पडली. या कार्यशाळेत पक्षाच्या पदाधिकारी व कार्यकर्त्यांना मार्गदर्शन करण्यात आले तसेच पक्षाची विचारधारा, संघटन बळकटीकरण आणि समाजसेवेच्या कार्याबाबत सविस्तर माहिती देण्यात आली.
कार्यक्रमात मान्यवरांनी पंडित दीनदयाळ उपाध्याय यांनी मांडलेल्या एकात्म मानवतावाद या विचारसरणीचे महत्त्व अधोरेखित केले. समाजातील प्रत्येक घटकाचा सर्वांगीण विकास साधण्यासाठी ही विचारधारा अत्यंत उपयुक्त असल्याचे त्यांनी सांगितले. समाजातील शेवटच्या घटकापर्यंत विकासाची फळे पोहोचविणे हेच या विचारसरणीचे मुख्य ध्येय असल्याचेही त्यांनी नमूद केले.
या कार्यशाळेदरम्यान उपस्थित कार्यकर्त्यांना संघटन अधिक मजबूत करण्यासाठी एकजुटीने काम करण्याचे आवाहन करण्यात आले. समाजात सकारात्मक विचार पोहोचविणे, जनतेच्या समस्या समजून घेणे आणि त्यावर उपाययोजना करण्यासाठी कार्यकर्त्यांनी सक्रिय राहावे, असेही मान्यवरांनी सांगितले. पक्षाचे कार्यकर्ते समाजहितासाठी सातत्याने काम करत राहून पंडित दीनदयाळ उपाध्याय यांच्या विचारांचा प्रसार करतील, असा विश्वासही यावेळी व्यक्त करण्यात आला.
या प्रशिक्षण शिबिरात स्थानिक पदाधिकारी, कार्यकर्ते तसेच नागरिक मोठ्या संख्येने उपस्थित होते. कार्यक्रमात पक्ष संघटन अधिक मजबूत करण्यावर विशेष भर देण्यात आला. कार्यशाळेमुळे कार्यकर्त्यांना पक्षाच्या ध्येयधोरणांची माहिती मिळाली तसेच सामाजिक कार्यासाठी प्रेरणा मिळाली.
