परभणी(प्रतिनिधी अनिल शेटे): गंगाखेड शहरात मासोळी कॅम्प येथे झाड पडून वाकलेल्या वीज खांबामुळे वीज प्रवाह तारा रस्त्यावर लोंबकळत असून नागरिकांच्या जीवाला धोका निर्माण झाला आहे. महावितरण कंपनीकडून दुर्लक्ष होत असल्याने मासोळी कॅम्प येथील लोकांचा तीव्र संताप व्यक्त केला जात आहे.
गंगाखेड तालुक्यातील मासोळी कॅम्प येथील गल्लीमधील मुख्य रस्त्यावर वीज खांब वाकल्याने वीज पुरवठा करणाऱ्या वीज तारा लोंबकळत आहे.त्यामुळे याठिकाणांहून जाणाऱ्या -येणाऱ्या नागरिकांच्या जीवाला धोका निर्माण झाला आहे.गत पंधरा दिवसापासून लोबकळत असलेल्या तारा दुरूस्ती करण्यासाठी शहर अभियंत्याना वेळ मिळत नाही.दुर्घटनेची वाट पाहतात असा प्रश्न नागरिक उपस्थित करतात.
याबाबत महावितरण कंपनीकडे तक्रार करण्यात आली. मात्र, त्याची अद्याप दखल घेण्यात आली नाही. यामुळे नागरिकांत संतापाचे वातावरण आहे. गंगाखेड तालुक्यात शहरी भागात महावितरण कंपनीच्या गलथान कारभारामुळे अनेक ठिकाणी विजेचा प्रवाह असलेल्या वीज तारा लोंबकळतात. येथील खांब वाकल्याने या वीजतारा गेल्या अनेक दिवसांपासून लोंबकळत आहे. यासंदर्भात अनेकदा महावितरण कंपनीकडे तक्रारी केल्या. मात्र, लोंबकळणाऱ्या वीज तारांची स्थिती जैसे थे आहे. मासोळी कॅम्प येथील नागरिक यांच्या घरासमोरील मुख्य रस्त्यावर विजेच्या तारा पूर्णपणे लोंबकळत आहेत
या तारा रस्त्यावरून जाणाऱ्या लोकांना लागत असल्याने कोणत्याही क्षणी याठिकाणी मोठी दुर्घटना होण्याची शक्यता नाकारता येत नाही. याबाबत नागरिकांनी महावितरण कंपनीला लोंबकळत असलेल्या वीज तारा सुरळीत करून देण्याची विनंती केली.मात्र, त्याचा काहीही उपयोग झाला नसल्याने लोंबकळत असलेल्या जिवंत विद्युत तारांमुळे दुर्घटना होण्याची शक्यता निर्माण झाली आहे. रस्त्याने जाणाऱ्या येणाऱ्या नागरिकांच्या जिवाला धोका निर्माण झाला आहे.त्यामुळे लोंबकळत असलेल्या जिवंत वीज तारा सुरळीत करण्याची मागणी मासोळी कॅम्प येथील नागरिकांनी केली आहे.
