विनोद पवार (जळगाव प्रतिनिधी) : जळगाव शहरातील कालिका माता मंदिर परिसरात वाढलेल्या अतिक्रमणांवर अखेर प्रशासनाने ठोस कारवाई करत मुख्य रस्ता पूर्णपणे मोकळा केला. अनेक दिवसांपासून रस्त्यालगत उभारलेले हातगाडे, तात्पुरती दुकाने आणि अनधिकृत शेड्समुळे वाहतुकीला अडथळा निर्माण होत होता. स्थानिक नागरिक आणि भाविकांकडून याबाबत सातत्याने तक्रारी केल्या जात होत्या.
महानगरपालिका आणि पोलीस प्रशासनाच्या संयुक्त पथकाने सकाळी संयुक्त मोहीम राबवत अतिक्रमण हटवले. कारवाईदरम्यान काही ठिकाणी सौम्य तणाव निर्माण झाला; मात्र पोलिसांच्या बंदोबस्तामुळे परिस्थिती नियंत्रणात राहिली. प्रशासनाने संबंधितांना पूर्वसूचना दिल्यानंतरच ही कारवाई करण्यात आल्याचे स्पष्ट केले.
या मोहिमेनंतर मंदिर परिसरातील मुख्य मार्ग सुटसुटीत आणि सुरक्षित झाला असून वाहनचालकांना मोठा दिलासा मिळाला आहे. भाविकांनाही मंदिरात ये-जा करताना आता कोणताही अडथळा जाणवत नाही.
स्थानिक नागरिकांनी प्रशासनाच्या निर्णयाचे स्वागत करत “रस्त्याने आता मोकळा श्वास घेतला, अशी प्रतिक्रिया दिली. पुढील काळात पुन्हा अतिक्रमण होऊ नये यासाठी नियमित पाहणी आणि कडक कारवाई केली जाईल, असे प्रशासनाने सांगितले आहे.
