प्रतिनिधी:(जाबिर खान) भारतीय जनता पक्षाच्या अल्पसंख्याक मोर्चाचे राष्ट्रीय अध्यक्ष जमाल सिद्दीकी यांच्या नुकत्याच झालेल्या गडचिरोली जिल्हा दौऱ्यादरम्यान भाजप अल्पसंख्याक मोर्चाचे जिल्हा उपाध्यक्ष सरफराज आलम यांनी त्यांची सदिच्छा भेट घेतली. या भेटीत गडचिरोली जिल्ह्यात अल्पसंख्याक मोर्चाचे संघटन अधिक सक्षम करण्याबाबत सविस्तर चर्चा करण्यात आली.
यावेळी राष्ट्रीय अध्यक्ष जमाल सिद्दीकी यांनी केंद्र व राज्य शासनाच्या लोककल्याणकारी योजना तळागाळातील नागरिकांपर्यंत प्रभावीपणे पोहोचविण्याची गरज अधोरेखित केली. तसेच अल्पसंख्याक समाजातील युवकांना मुख्य प्रवाहात आणणे, सामाजिक सलोखा कायम ठेवणे आणि विकासाभिमुख कार्याला प्राधान्य देत संघटना अधिक मजबूत करण्याचे आवाहन त्यांनी कार्यकर्त्यांना केले.
जिल्हा उपाध्यक्ष सरफराज आलम यांनी गडचिरोली जिल्ह्यातील आगामी संघटनात्मक उपक्रमांचा आराखडा राष्ट्रीय अध्यक्षांसमोर सादर केला. जनसंपर्क अभियान, कार्यकर्ता मेळावे आणि विविध सामाजिक उपक्रमांच्या माध्यमातून संघटनेचा विस्तार करण्याचा निर्धार यावेळी व्यक्त करण्यात आला.
या भेटीनंतर जिल्ह्यातील भाजप अल्पसंख्याक मोर्चाच्या कार्यकर्त्यांमध्ये उत्साहाचे वातावरण निर्माण झाले असून, राष्ट्रीय नेतृत्वाच्या मार्गदर्शनाखाली संघटन अधिक बळकट करण्यासाठी कार्यकर्ते कटिबद्ध असल्याचे सरफराज आलम यांनी सांगितले.
