जळगावमध्ये ACB ची धडाकेबाज कारवाई; सार्वजनिक बांधकाम विभागात खळबळ…

जळगाव (जिल्हा प्रतिनिधी : विनोद पवार) :- 
जळगाव जिल्ह्यात लाचलुचपतखोरीचे प्रकार थांबण्याचे नाव घेत नसताना, आज शनिवारी लाचलुचपत प्रतिबंधक विभागाने (ACB) सार्वजनिक बांधकाम विभागात (PWD) मोठी आणि धडाकेबाज कारवाई केली. या कारवाईमुळे शासकीय यंत्रणेत मोठी खळबळ उडाली असून, प्रलंबित बिल मंजूर करून देण्यासाठी ५ लाख रुपयांची लाच स्वीकारताना शाखा अभियंता योगेश अहिरे यांना रंगेहात अटक करण्यात आली आहे.
मिळालेल्या माहितीनुसार, जळगाव जिल्ह्यातील एका नोंदणीकृत कंत्राटदाराने सार्वजनिक बांधकाम विभागांतर्गत विविध विकासकामे पूर्ण केली होती. संबंधित कामांची लाखो रुपयांची बिले प्रलंबित होती. ही बिले मंजूर करून देण्यासाठी शाखा अभियंता योगेश अहिरे यांनी तब्बल १५ लाख रुपयांची लाच मागितल्याचा आरोप आहे.
लाच देण्याची इच्छा नसल्याने संबंधित कंत्राटदाराने लाचलुचपत प्रतिबंधक विभागाकडे तक्रार दाखल केली. त्यानंतर एसीबीच्या पथकाने गोपनीय पद्धतीने तक्रारीची पडताळणी केली असता लाचेची मागणी झाल्याचे निष्पन्न झाले. पुढील तडजोडीनंतर पहिल्या टप्प्यात ५ लाख रुपये देण्याचे ठरले होते.
आज दुपारच्या सुमारास सार्वजनिक बांधकाम विभागाच्या कार्यालय परिसरात एसीबीने सापळा रचला. ठरल्याप्रमाणे पहिल्या हप्त्याची ५ लाख रुपयांची रोकड स्वीकारत असतानाच एसीबीच्या अधिकाऱ्यांनी अचानक कारवाई करत शाखा अभियंता योगेश अहिरे यांना रंगेहात पकडले आणि तात्काळ अटक केली.
या कारवाईमुळे संपूर्ण शासकीय वर्तुळात मोठी खळबळ उडाली असून, संबंधित अधिकाऱ्याविरोधात गुन्हा दाखल करण्याची प्रक्रिया सुरू असल्याची माहिती समोर आली आहे.