माणगांव (प्रतिनिधी जहेंद्र मुंढे) : रायगड जिल्ह्यातील माणगाव तालुक्यातील लोणेरे परिसरात एक धक्कादायक घटना उघडकीस आली आहे. येथील ‘ओमकार रेसिडेन्सी’ या लॉजमध्ये एका तरुणीचा संशयास्पद मृतदेह आढळून आल्याने परिसरात भीतीचे वातावरण निर्माण झाले आहे.
प्राथमिक माहितीनुसार, एका तरुणाने संबंधित तरुणीला लॉजवर आणले होते. त्यानंतर बंद खोलीत तिच्यावर जीवघेणा हल्ला करून हत्या केल्याचा संशय व्यक्त करण्यात येत आहे. ही घटना भरदिवसा घडल्याने नागरिकांमध्ये मोठी खळबळ उडाली आहे.
घटनेची माहिती मिळताच नागरिकांनी मोठ्या प्रमाणावर गर्दी केली. कायदा व सुव्यवस्थेचा प्रश्न निर्माण होऊ नये यासाठी तातडीने पोलीस बंदोबस्त तैनात करण्यात आला. गोरेगाव पोलीस ठाण्याचे अधिकारी व फॉरेन्सिक पथक घटनास्थळी दाखल होऊन सखोल तपास सुरू केला आहे. पोलिसांनी पंचनामा करून मृतदेह शवविच्छेदनासाठी पाठवला असून, मृत तरुणी ही लोणेरे परिसरातील रहिवासी असल्याचे समोर आले आहे.
दरम्यान, तरुणीसोबत लॉजवर आलेला संशयित तरुण हा रत्नागिरी जिल्ह्यातील असल्याची माहिती तपासात उघड झाली आहे. घटनेनंतर तो फरार झाला असून, त्याचा शोध घेण्यासाठी पोलिसांकडून विशेष पथके तयार करण्यात आली आहेत. सीसीटीव्ही फुटेजची तपासणी तसेच लॉजमधील कर्मचारी आणि साक्षीदारांचे जबाब नोंदवण्याचे काम सुरू आहे.
हत्येमागील नेमके कारण अद्याप स्पष्ट झालेले नाही. प्रेमप्रकरण, वैयक्तिक वाद किंवा इतर कोणताही हेतू असू शकतो, या सर्व शक्यतांचा पोलिसांकडून तपास केला जात आहे.
भरदिवसा लॉजमध्ये घडलेली ही घटना सुरक्षेच्या दृष्टीने गंभीर आहे. लॉजिंग व्यवसायात ओळखपत्रांची सक्ती, नोंदवही तपासणी आणि सुरक्षा उपाय अधिक कडक करणे आवश्यक आहे. यामुळे भविष्यात अशा घटनांना आळा बसू शकतो आणि नागरिकांमध्ये सुरक्षिततेची भावना निर्माण होईल.
