Times of Maharashtra Desk: पुण्यातील प्रसिद्ध पोर्शे कार अपघात प्रकरणातील आरोपी विशाल अगरवाल याचा जामीन मुंबई उच्च न्यायालयाने पुन्हा फेटाळला असून, त्याचा कोठडीतील मुक्काम आणखी वाढला आहे. पुण्यातील या अपघातात दोन अभियंत्यांचा मृत्यू झाला होता.या प्रकरणात, आपल्या मुलाला वाचवण्यासाठी बांधकाम उद्योगपती विशाल अगरवालने वैद्यकीय अहवालात छेडछाड केल्याचे उघड झाले होते. यामुळे मुंबई उच्च न्यायालयाने त्याचा जामीन फेटाळण्याचा निर्णय घेतला. आरोपी गेल्या १७ महिन्यांपासून जेलमध्ये आहे.
त्याचबरोबर, पुण्यातील पोर्शे अपघातात अल्पवयीन कारचालकाच्या रक्ताचे नमुने बदलण्याच्या प्रकरणी डॉ. अजय तावरेंचा जामीन सुद्धा न्यायालयाने फेटाळला आहे. १९ मे २०२४ रोजी पुण्यातील कल्याणीनगर भागात एका भरधाव पोर्शे कारने दोन जणांचा जीव घेतला होता. संबंधित कारचालक अल्पवयीन असल्यामुळे त्याला बाल न्याय मंडळात हजर करण्यात आले होते.अपघातानंतर आरोपी विशाल अगरवालने मद्यप्राशन केलेल्या मुलाच्या रक्ताचे नमुने बदलण्यासाठी कारस्थान रचल्याचे समोर आले. २१ मे २०२४ रोजी पुणे पोलिसांनी विशाल अगरवालला छत्रपती संभाजीनगर परिसरातून अटक केली होती.
याप्रकरणी पोलिसांकडूनही गैरवर्तन आणि निष्काळजीपणा झाल्याचे उघड झाले. येरवडा पोलिस ठाण्याचे पोलीस निरीक्षक राहुल जगदाळे आणि सहायक पोलीस निरीक्षक विश्वनाथ तोडकरी यांना सेवेतून बडतर्फ करण्यात आले आहे.अपघात १९ मे २०२४ रोजी रात्री पुण्यातील कोरेगाव पार्क परिसरात घडला होता. एका हाय-स्पीड पोर्शे कारने दुचाकीवरून जाणाऱ्या अश्विनी कोस्टा आणि अनिश अवधिया यांना धडक दिली होती. दोन्ही अभियंते घटनास्थळीच मृत्यूमुखी पडले. अपघाताच्या वेळी गाडी चालवणारा तरुण १७ वर्षे आणि ८ महिन्यांचा होता आणि मद्यप्राशन केलेला होता. पुणे पोलिसांनी त्याला प्रौढ म्हणून वागवण्याची मागणी केली होती, कारण तो फक्त ४ महिने १८ वर्षांचा नसल्यामुळे बाल न्याय मंडळाकडे हजर करण्यात आला.
सुरुवातीला पोलिसांनी निष्काळजीपणे गाडी चालवल्याचा गुन्हा दाखल केला होता, परंतु आरोपी दारू पिऊन असल्याचे उघडकीस आल्यानंतर प्रकरण गंभीर बनले. सुरुवातीला बाल न्याय मंडळाने आरोपीला १४ तासांत १०० शब्दांचा निबंध, समाजसेवा आणि अभ्यासावर लक्ष केंद्रित करण्याच्या अटींवर जामीन मंजूर केला होता, ज्यामुळे देशभरात संतापाचा उठाव झाला.
