रोहा तालुक्यात चाकू हल्ला; वेगाने गाडी चालवण्याच्या वादातून तिघे जखमी

दिनेश चाफळकर (रायगड प्रतिनिधी) : रोहा तालुका येथील चणेरा भागातील खारखर्डी पारनखार गावात मोटारसायकल वेगाने चालवण्याच्या कारणावरून झालेल्या वादाचे रूपांतर थेट चाकू हल्ल्यात झाल्याची धक्कादायक घटना घडली आहे. या हल्ल्यात पती-पत्नींसह गावातील आणखी एक व्यक्ती जखमी झाली असून परिसरात भीतीचे वातावरण निर्माण झाले आहे.
काय घडले नेमके?
मिळालेल्या माहितीनुसार, काही तरुण मोटारसायकलवरून गावात सुसाट वेगाने येत होते. गावातील नागरिकांनी त्यांना गाडी हळू चालवण्याचा सल्ला दिला. मात्र या सूचनेचा राग मनात धरून संबंधित तरुणांनी वाद घालत अचानक धारदार चाकूने सपासप वार केल्याचे सांगितले जाते.
या अचानक झालेल्या हल्ल्यात पती-पत्नी गंभीर जखमी झाले असून त्यांच्यासह गावातील आणखी एक व्यक्ती जखमी झाली आहे. जखमींना तातडीने जवळच्या रुग्णालयात उपचारासाठी दाखल करण्यात आले.
आरोपींना अटक
घटनेची माहिती मिळताच रोहा पोलीस स्टेशन चे पथक तातडीने घटनास्थळी दाखल झाले. परिसरातील सीसीटीव्ही फुटेजची तपासणी करण्यात आली. त्याआधारे दोन्ही आरोपींची ओळख पटवून त्यांना ताब्यात घेण्यात आले आहे.
या प्रकरणाचा पुढील तपास पोलीस निरीक्षक मारुती पाटील यांच्या मार्गदर्शनाखाली सुरू आहे. आरोपींवर संबंधित कलमान्वये गुन्हा दाखल करून अधिक चौकशी करण्यात येत आहे.
परिसरात तणावाचे वातावरण
घटनेनंतर गावात काही काळ तणावाचे वातावरण निर्माण झाले होते. पोलिसांनी परिस्थिती नियंत्रणात आणत नागरिकांना शांततेचे आवाहन केले आहे.