धनंजय कवडे (शिखर शिंगणापूर प्रतिनिधी) :
माण तालुक्यातील येळेवाडी येथे पी.एम.डी. उद्योग समूह व एमडी दडस सामाजिक व शैक्षणिक विचार मंच, महाराष्ट्र राज्य यांच्या संयुक्त विद्यमाने ‘महाराष्ट्र देश न्यूज मराठी’च्या प्रथम वर्धापन दिनानिमित्त पहिले राज्यस्तरीय ‘महाराष्ट्रदेश’ ग्रामीण मराठी साहित्य संमेलन मोठ्या उत्साहात संपन्न झाले.
श्री संत गाडगेबाबा महाराज विद्यालय, हिराई साहित्य नगरी, येळेवाडी (ता. माण) येथे आयोजित या संमेलनास राज्यभरातील साहित्यिक, कवी, कथाकार व साहित्यप्रेमी मोठ्या संख्येने उपस्थित होते.
कार्यक्रमाच्या अध्यक्षस्थानी ग्रामीण कथाकार रवींद्र कोकरे होते, तर प्रमुख पाहुणे म्हणून ज्येष्ठ पत्रकार अरविंद मेहता उपस्थित होते. यावेळी रुक्मिणी गलांडे (सेवा नियुक्त पोलीस, पुणे), प्रवीण काकडे (प्रदेशाध्यक्ष, ऑल इंडिया धनगर समाज, दिल्ली), डॉ. प्रमोद बळवंत भोसले (आयुक्त, आयकॉन मुंबई) तसेच शिवाजी महानगर संचालक, संत गाडगेबाबा मिशन, मुंबई यांची प्रमुख उपस्थिती लाभली.
संमेलनाचे उद्घाटन मान्यवरांच्या हस्ते दीपप्रज्वलन व संत गाडगेबाबा यांच्या प्रतिमेला पुष्पहार अर्पण करून करण्यात आले. अध्यक्षीय भाषणात रवींद्र कोकरे यांनी ग्रामीण साहित्याची परंपरा, बदलत्या काळातील आव्हाने आणि नवोदित साहित्यिकांना व्यासपीठ उपलब्ध करून देण्याचे महत्त्व अधोरेखित केले. ग्रामीण जीवनातील वास्तव, शेतकरी, कष्टकरी, सामाजिक प्रश्न आणि संस्कृती यांचे साहित्यिक दर्शन घडविणे ही काळाची गरज असल्याचे त्यांनी नमूद केले.
प्रमुख पाहुणे अरविंद मेहता यांनी आपल्या मनोगतात ग्रामीण भागातील प्रतिभावंत साहित्यिकांना संधी देण्यासाठी अशा संमेलनांची आवश्यकता अधोरेखित केली. माध्यमांच्या माध्यमातून ग्रामीण साहित्याला अधिक व्यापक व्यासपीठ मिळू शकते, असे त्यांनी सांगितले.
या संमेलनात दोन सत्रांमध्ये विविध कार्यक्रमांचे आयोजन करण्यात आले. पहिल्या सत्रात कथाकथनाचा कार्यक्रम झाला. विविध भागांतून आलेल्या कथाकारांनी ग्रामीण जीवन, सामाजिक परिवर्तन, परंपरा व आधुनिकतेचा संघर्ष या विषयांवर आधारित कथा सादर केल्या. उपस्थितांनी कथांना उत्स्फूर्त दाद दिली.
दुसऱ्या सत्रात कविसंमेलन रंगले. राज्यातील विविध कवींनी सामाजिक जाणीव, निसर्ग, प्रेम, ग्रामीण संस्कृती आणि समकालीन घडामोडींवर आधारित कविता सादर केल्या. काव्यसादरीकरणामुळे सभागृहात साहित्यिक वातावरण निर्माण झाले.
कार्यक्रमाच्या यशस्वी आयोजनासाठी आयोजक संस्थेचे पदाधिकारी, स्वयंसेवक आणि ग्रामस्थ यांनी परिश्रम घेतले. संमेलनामुळे येळेवाडी परिसरात साहित्यिक चैतन्य निर्माण झाले असून ग्रामीण साहित्याला नवे बळ मिळाल्याची भावना उपस्थितांनी व्यक्त केली.
कार्यक्रमाचे सूत्रसंचालन व आभारप्रदर्शन आयोजकांच्या वतीने करण्यात आले. पहिल्याच वर्षी राज्यस्तरीय पातळीवर संमेलन यशस्वीरीत्या पार पडल्याबद्दल आयोजकांचे सर्व स्तरांतून अभिनंदन करण्यात येत आहे
