Times of Maharashtra Desk, Junnar : जुन्नर तालुक्यातील आणे पठारावर निसर्ग अभ्यासकांना एक अत्यंत दुर्मिळ आणि नामशेष होण्याच्या मार्गावर असलेल्या ‘इजिप्शियन गिधाडाचे’ दर्शन झाले आहे. या गिधाडाच्या दर्शनामुळे पक्षीप्रेमी आणि पर्यावरण अभ्यासकांमध्ये उत्साहाचे वातावरण आहे. निसर्गयात्री संस्थेचे सदस्य आणे पठारावर माळरानाचा अभ्यास दौरा करत असताना त्यांना हा पांढऱ्या रंगाचा ‘नियोफ्रॉन’ (Neophron) जातकुळातील पक्षी आढळला. हा पक्षी म्हणजे इजिप्शियन गिधाडाचे पिल्लू होते.
आंतरराष्ट्रीय निसर्ग संवर्धन संघटनेने या गिधाडाच्या प्रजातीला रेड लिस्टमध्ये, नामशेष होण्याच्या मार्गावर असलेली प्रजाती म्हणून वर्गीकृत केले आहे. काही वर्षांपूर्वीपर्यंत ही गिधाडे महाराष्ट्रात आणि भारतात बऱ्यापैकी आढळत होती, परंतु त्यांची संख्या आता धोकादायक पातळीपर्यंत कमी झाली आहे.या गिधाडांना नैसर्गिक सफाई कामगार म्हटले जाते. ते मृत जनावरांचे मांस खाऊन परिसर स्वच्छ ठेवतात, ज्यामुळे रोगराई पसरण्यास आळा बसतो.
अशा स्थितीत अणे पठारासारख्या माळरानात या गिधाडाचे दर्शन होणे, हे या भागातील जैवविविधतेच्या दृष्टीने अत्यंत आशादायक मानले जात आहे. या घटनेमुळे या अधिवासाच्या संवर्धनाचे महत्त्व पुन्हा एकदा अधोरेखित झाले आहे.
