दौंड (प्रतिनिधी संघराज गायकवाड, मयुर साळवे) : डॉ. बाबासाहेब आंबेडकर यांच्या 135 व्या जयंतीनिमित्त दौंड शहरात न्यू महाराष्ट्र पँथर सेनेच्या वतीने विविध सामाजिक उपक्रमांसह भव्य कार्यक्रमांचे आयोजन करण्यात आले. या सोहळ्यात निर्भीड पत्रकार विजय जाधव यांना “भीम पँथर गौरव पुरस्कार” देऊन सन्मानित करण्यात आले.
न्यू महाराष्ट्र पँथर सेनेचे अध्यक्ष पँथर जयदीप माणिक बगाडे यांच्या संकल्पनेतून हा कार्यक्रम मोठ्या उत्साहात पार पडला. 11 एप्रिल रोजी महिलांसाठी ‘पैठणीचा खेळ’ या विशेष उपक्रमाचे आयोजन करण्यात आले, तर 12 एप्रिल रोजी गरजू विद्यार्थ्यांना शालेय साहित्य वाटप करण्यात आले. याचबरोबर पत्रकार, डॉक्टर, प्रशासकीय अधिकारी आणि सामाजिक कार्यकर्त्यांचा सन्मानचिन्ह देऊन गौरव करण्यात आला.
पत्रकार विजय जाधव यांनी डिजिटल माध्यमातून समाजातील विविध प्रश्नांवर आवाज उठवून प्रशासनापर्यंत पोहोचवण्याचे उल्लेखनीय कार्य केल्याबद्दल त्यांना हा सन्मान प्रदान करण्यात आला.
तसेच 14 एप्रिल रोजी अन्नदान आणि सुमारे 250 नागरिकांना डॉ. आंबेडकरांच्या विचारांची पुस्तके मोफत वाटप करण्यात आली. दौंड नगर परिषद वाचनालयाला पुस्तक संच भेट देत वाचन संस्कृती वाढवण्याचे आवाहन करण्यात आले.
या कार्यक्रमाला विविध मान्यवरांसह भीम अनुयायांची मोठ्या संख्येने उपस्थिती होती. कार्यक्रमाचे सूत्रसंचालन रवींद्र पवार यांनी केले, तर आभार प्रदर्शन श्रीकांत थोरात यांनी मानले.
