Times of Maharashtra Desk : पुणे महापालिका निवडणुकीच्या पार्श्वभूमीवर शहरातील प्रचारसभांना जोर चढला असून प्रभाग क्रमांक २३ मध्ये राजकीय हालचालींना वेग आला आहे. या प्रभागातून राष्ट्रवादी काँग्रेस (अजित पवार गट)चे युवा नेते शाहबाज खान यांनी प्रत्यक्ष मतदारांच्या दारात जाऊन संवाद साधत प्रचारात आघाडी घेतली आहे.
शाहबाज खान हे डोअर-टू-डोअर प्रचार करत नागरिकांच्या अडचणी, समस्या आणि अपेक्षा जाणून घेत असून स्थानिक प्रश्नांवर थेट चर्चा करत आहेत. पाणीपुरवठा, स्वच्छता, रस्त्यांची दुरवस्था, अतिक्रमण आणि मूलभूत सुविधांचा अभाव यासारख्या प्रश्नांबाबत मतदारांकडून मोठ्या प्रमाणात प्रतिक्रिया मिळत आहेत.
प्रभाग क्रमांक २३ हा शहराच्या मध्यवर्ती भागात असल्याने येथे अनेक मातब्बर आणि अनुभवी उमेदवार रिंगणात उतरले आहेत. त्यामुळे या प्रभागात यंदा चुरशीची आणि लक्षवेधी लढत होणार असल्याचे राजकीय निरीक्षकांचे मत आहे.
राष्ट्रवादी काँग्रेस (अजित पवार गट)कडून प्रभाग २३ ड मधून शाहबाज खान तर २३ क मधून सोनाली आंदेकर या उमेदवारी करत आहेत. या दोन्ही उमेदवारांच्या प्रचाराला स्थानिक कार्यकर्ते आणि समर्थकांकडून मोठा प्रतिसाद मिळत असून राष्ट्रवादी गटाने या भागात ताकदीनिशी प्रचार सुरू केल्याचे चित्र दिसून येत आहे.
आगामी काही दिवसांत प्रचार आणखी तीव्र होणार असून प्रभाग २३ मधील ही निवडणूक पुणे महापालिकेच्या राजकारणात महत्त्वाची ठरणार आहे.
