दौंड (प्रतिनिधी संघराज गायकवाड): दौंड शहरातील सरपंच वस्ती–गोपाळवाडी रोड परिसरात महिला, मुली व ज्येष्ठ नागरिकांना होत असलेल्या त्रासाबाबत तसेच अवैध मटका, ऑनलाईन जुगार आणि उशिरापर्यंत सुरू राहणाऱ्या बिअर शॉपीविरोधात कारवाई करण्याची मागणी नागरिकांनी दौंड पोलीस स्टेशनकडे निवेदनाद्वारे केली आहे.
निवेदनात म्हटले आहे की, सरपंच वस्ती–गोपाळवाडी रोड परिसरात सायंकाळी मोठ्या प्रमाणात महिला, मुली, विद्यार्थीनी व ज्येष्ठ नागरिकांची वर्दळ असते. भाजी मंडई तसेच ट्युशनसाठी ये-जा करणाऱ्या महिलांना व मुलींना काही समाजकंटकांकडून त्रास दिला जात असल्याच्या तक्रारी आहेत. सार्वजनिक ठिकाणी विनाकारण गर्दी करून महिलांकडे पाहणे, टिप्पणी करणे, अश्लील हावभाव करणे, आरडाओरडा करणे व सार्वजनिक शांततेचा भंग करणे असे प्रकार घडत असल्याने परिसरात असुरक्षिततेचे वातावरण निर्माण झाल्याचे नागरिकांनी नमूद केले आहे.
तसेच या परिसरात राजरोसपणे मटका जुगार व ऑनलाईन चक्री गेमच्या माध्यमातून जुगार सुरू असल्याची चर्चा नागरिकांमध्ये असून त्यामुळे संशयित व्यक्तींची वर्दळ वाढल्याचेही निवेदनात म्हटले आहे.
याशिवाय परिसरातील एका बिअर शॉपीचा व्यवसाय नियमीत वेळेपेक्षा अधिक काळ, रात्री उशिरापर्यंत सुरू राहत असल्याचा आरोप करण्यात आला आहे. त्यामुळे मद्यधुंद व्यक्तींची गर्दी वाढून गोंधळ, शिवीगाळ, वाहनांचा आवाज व सार्वजनिक शांततेचा भंग होत असल्याचे नागरिकांचे म्हणणे आहे.
या सर्व बाबींची गांभीर्याने दखल घेऊन परिसरात नियमित पोलीस गस्त वाढवावी, महिलांची छेडछाड करणाऱ्यांवर कठोर कारवाई करावी, अवैध मटका व ऑनलाईन जुगार चालविणाऱ्यांवर तात्काळ कारवाई करावी तसेच संबंधित बिअर शॉपीच्या परवान्याची तपासणी करून नियमभंग आढळल्यास कायदेशीर कारवाई करावी, अशी मागणी नागरिकांनी पोलीस प्रशासनाकडे केली आहे.
