दौंड-(प्रतिनिधी राहुल आढाव, संघराज गायकवाड) : शहरात मकर संक्रांत सणाच्या पार्श्वभूमीवर अवैध नायलॉन मांजाच्या विक्रीविरोधात दौंड पोलिसांनी कारवाई करत एका महिलेवर गुन्हा दाखल केला आहे. दि. १० जानेवारी २०२६ रोजी सायंकाळी साडेपाचच्या सुमारास खाटीकगल्ली परिसरात छापा टाकून रोशन युनुस शेख (वय ६०, रा. खाटीकगल्ली, ता. दौंड) हिच्या घरातून बंदी असलेला नायलॉन मांजा जप्त करण्यात आला. या छाप्यात विविध कंपन्यांचे एकूण सुमारे १,००० रुपयांचे नायलॉन मांजाचे रोल पोलिसांनी ताब्यात घेतले.
नायलॉन मांजामुळे पक्षी, दुचाकीस्वार तसेच लहान मुलांना गंभीर दुखापती होण्याचा धोका असतो. त्यामुळे शासनाने नायलॉन मांजाची निर्मिती, विक्री व वापरावर पूर्ण बंदी घातली आहे. मात्र, शहरातील काही स्थानिक दुकानदार व फुटकळ विक्रेते अद्यापही खुलेआम नायलॉन मांजाची विक्री करत असल्याची चर्चा नागरिकांमध्ये सुरू आहे.
एका दुकानदारावर कारवाई झाल्यानंतरही इतर दुकानदारांवर कारवाई होत नसल्याने ही कारवाई केवळ दिखाऊ तर नाही ना, असा प्रश्न उपस्थित होत आहे. शहरातील नागरिक, सामाजिक कार्यकर्ते व पक्षीप्रेमींनी दौंड पोलिस प्रशासनाने इतर दुकानदार, गुप्तपणे विक्री करणारे विक्रेते व साठेबाज यांच्यावरही तत्काळ कठोर कारवाई करावी, अशी जोरदार मागणी केली आहे.
