दिनेश चाफळकर (प्रतिनिधी रायगड ) : महाराष्ट्र राज्यातील पोलीस यंत्रणेला हादरवून टाकणारी गंभीर बाब समोर आली आहे. महाराष्ट्र पोलीस दलातील एका अधिकाऱ्याने जातिवाचक अपमान, मानसिक छळ व दबावाचे गंभीर आरोप करत थेट वरिष्ठांकडे धाव घेतली आहे. महाड शहर पोलीस ठाण्यात कार्यरत पोलीस निरीक्षक रमेश तडवी यांनी वरिष्ठ अधिकाऱ्यांना पाठवलेल्या पत्रात परिस्थिती अत्यंत चिंताजनक असल्याचे नमूद केले आहे.
तडवी यांनी सात वरिष्ठ अधिकाऱ्यांवर वारंवार जातिवाचक शब्दांत अपमान, बदनामी आणि मानसिक त्रास दिल्याचा आरोप केला आहे. आपण आदिवासी भिल्ल समाजातील असल्यामुळे कमी लेखले जाते, बदलीची भीती दाखवली जाते तसेच अप्रत्यक्ष धमक्या दिल्या जातात, असा दावा त्यांनी पत्रात केला आहे. सततच्या तणावाचा परिणाम त्यांच्या कुटुंबीयांवरही होत असल्याचे त्यांनी नमूद केले आहे.
याशिवाय स्थानिक राजकीय प्रकरणात हस्तक्षेप करण्यासाठी दबाव आणल्याचा आरोपही त्यांनी केला आहे. एका गुन्ह्याच्या तपासात मंत्री भारत गोगावले यांच्या पुत्र विकास गोगावले यांना सहकार्य करण्यासाठी काही व्यक्तींना बेकायदेशीर अटक करण्यास सांगितल्याचा गंभीर आरोप पत्रात करण्यात आला आहे. आपण त्यास नकार दिल्यानंतरच लक्ष्य करण्यात आल्याचा दावा तडवी यांनी केला आहे.
या प्रकरणामुळे पोलीस वर्तुळात खळबळ उडाली असून सखोल चौकशीची मागणी होत आहे. वरिष्ठ पातळीवर या आरोपांची पडताळणी होण्याची शक्यता व्यक्त केली जात आहे.
