धनंजय कावडे (शिखर शिंगणापूर प्रतिनिधी ) : वडुज शहरात घरगुती छळाच्या पार्श्वभूमीवर एका विवाहित महिलेने टोकाचा निर्णय घेतल्याची धक्कादायक घटना समोर आली आहे. मौजे वडुज, तालुका खटाव येथील शांताई पार्क परिसरातील विती अपार्टमेंटमध्ये ही घटना घडली. या प्रकरणी वडुज पोलीस ठाणे येथे पतीसह तिघांविरोधात गुन्हा दाखल करण्यात आला असून पुढील तपास सुरू आहे.
मृत महिला मेघा विनायक पवार यांना पती विनायक पवार, दिर विजय उर्फ बंडा पवार आणि सासरे नंदकुमार पवार यांच्याकडून वारंवार मारहाण, शिवीगाळ, मानसिक छळ तसेच जिवे मारण्याच्या धमक्या दिल्या जात असल्याचा आरोप फिर्यादीत करण्यात आला आहे. या सातत्यपूर्ण शारीरिक व मानसिक त्रासाला कंटाळून मेघा पवार यांनी राहत्या घरातील स्वयंपाकघरात साडीच्या सहाय्याने लोखंडी हुकाला गळफास घेऊन आत्महत्या केल्याचे तक्रारीत नमूद आहे.
घटनेची माहिती मिळताच पोलिसांनी घटनास्थळी धाव घेत पंचनामा करून मृतदेह शवविच्छेदनासाठी पाठविला. प्राथमिक चौकशीनंतर संबंधित तिघांविरोधात आत्महत्येस प्रवृत्त केल्याप्रकरणी गुन्हा नोंदविण्यात आला आहे. या घटनेमुळे वडुज शहरात एकच खळबळ उडाली आहे.
दरम्यान, पवार कुटुंबात यापूर्वीही मेघा पवार यांची जाऊ पायल विजय पवार आणि सासू मंदाकिनी पवार यांनीही आत्महत्या केल्याची चर्चा परिसरात रंगत आहे. या पार्श्वभूमीवर पोलिसांकडून त्या घटनांचीही माहिती पडताळली जात असल्याचे समजते.
घरगुती हिंसाचार आणि मानसिक छळाचे गंभीर परिणाम पुन्हा एकदा या घटनेतून समोर आले आहेत. दोषींवर कठोर कारवाई करावी, अशी मागणी नागरिकांकडून होत आहे. पोलिसांनी या प्रकरणाचा सखोल तपास सुरू केला असून संबंधितांची चौकशी करण्यात येत आहे.
