ब्रह्मपुरी:प्रतिनिधी ब्रह्मपुरी तालुक्यातील मौजा रूपाला मेंढा/आकापूर येथील गावालगत असलेल्या तलावामध्ये मागील तीन दिवसांपासून रात्रीच्या वेळी पाण्यावर एक रहस्यमय प्रकाश चमचमताना दिसत होता. या प्रकारामुळे संपूर्ण परिसरात भीतीचे आणि विविध चर्चांचे वातावरण निर्माण झाले होते. अखेर, चंद्रपूर येथील ‘एसडीआरएफ’ पथकाने राबविलेल्या विशेष शोधमोहिमेत या रहस्याचा पर्दाफाश झाला असून, पाण्याखाली सुरू असलेला एक सामान्य एलईडी चार्जिंग बल्ब या सर्व गोंधळाचे कारण असल्याचे निष्पन्न झाले आहे
रूपाला मेंढा परिसरातील तलावात अचानक प्रकाश चमकू लागल्याने गावकऱ्यांमध्ये कमालीची उत्सुकता आणि भीती पसरली होती. काही नागरिकांनी याकडे दैवी चमत्कार तर काहींनी मांत्रिक प्रकार किंवा गुप्तधन असल्याचा संशय व्यक्त केला. त्यातच काही स्थानिक वृत्तपत्रांनी घटनेची कोणतीही शहानिशा न करता थेट अंधश्रद्धा पसरवणाऱ्या आणि भीतीदायक बातम्या प्रसिद्ध केल्यामुळे परिसरात अफवांचे पेव फुटले होते.
घटनेचे गांभीर्य ओळखून ब्रह्मपुरी पोलिसांनी तातडीने चंद्रपूरच्या राज्य आपत्ती प्रतिसाद दलाला एसडीआरएफ पाचारण केले. या पथकातील जवानांनी तलावाच्या पाण्यात उतरून सखोल शोधमोहीम राबवली. या दरम्यान जवानांना पाण्यात चालू स्थितीत असलेला एक ‘एलईडी चार्जिंग बल्ब’ सापडला, जो पाण्याखाली सतत ब्लिंक होत होता. हा प्रकार उघडकीस आल्यानंतर तलावात कोणताही चमत्कार नसून तो केवळ एक तांत्रिक बल्ब असल्याचे स्पष्ट झाले आणि अफवांना पूर्णविराम मिळाला. सध्या या परिसरात पूर्णपणे शांतता असून नागरिकांनी सुटकेचा श्वास सोडला आहे.
कोणत्याही घटनेची सत्यता न तपासता अफवांवर विश्वास ठेवणे पूर्णपणे चुकीचे आहे. वृत्तपत्रांनी आणि माध्यमांनी समाजात अंधश्रद्धा पसरणार नाही याची काळजी घेतली पाहिजे. पूर्ण शहानिशा करून जे सत्य आहे, तीच बातमी जनतेसमोर आणावी. नागरिकांनी कोणत्याही अंधश्रद्धेवर विश्वास ठेवू नये किंवा अंधश्रद्धा पसरवण्याचे काम करू नये.”— प्रमोद बानबले पोलीस निरीक्षक, ब्रह्मपुरी
