मारेगाव (प्रतिनिधी देवा आत्राम) : नरसाळा येथील पेसा क्षेत्रात बंद पडलेल्या जुन्या दगड खाणीत कपडे धुण्यासाठी गेलेल्या महिलेचा पाय घसरून बुडून मृत्यू झाल्याची दुर्दैवी घटना १९ एप्रिल रोजी सकाळी घडली. या घटनेमुळे परिसरात हळहळ व्यक्त केली जात आहे.
मृत महिला बेबी तुळशीराम राजगडकर (वय ५५) या सकाळी सुमारे ८.३० वाजता घरातील कपडे धुण्यासाठी गावाजवळील बंद पडलेल्या खाणीकडे गेल्या होत्या. गेल्या काही दिवसांपासून खाणीत पावसाचे पाणी साचले होते. कपडे धुत असताना अचानक त्यांचा पाय घसरला आणि त्या खोल पाण्यात पडल्या. पाण्याचा अंदाज न आल्याने त्यांचा बुडून मृत्यू झाला.
दरम्यान बराच वेळ उलटल्यानंतर त्या घरी न परतल्याने कुटुंबीयांनी शोधाशोध सुरू केली. खाणीजवळ त्यांचे कपडे व साहित्य आढळून आले. त्यानंतर ग्रामस्थांच्या मदतीने शोध घेतला असता त्यांचा मृतदेह पाण्यात तरंगताना आढळून आला.
घटनेची माहिती मिळताच स्थानिक पोलिसांनी घटनास्थळी धाव घेतली. मृतदेहाचा पंचनामा करण्यात आला असून पुढील तपास मारेगाव पोलीस ठाणे करत आहे.
