जळगाव (प्रतिनिधी विनोद पवार) : राज्यात नवीन जिल्हे आणि तालुक्यांच्या निर्मितीचा प्रश्न पुन्हा चर्चेत आला असताना, जळगाव जिल्ह्याचे विभाजन करून भुसावळ स्वतंत्र जिल्हा तसेच वरणगाव स्वतंत्र तालुका निर्माण करण्याची मागणी आता जनआंदोलनाचे स्वरूप धारण करत आहे. वरणगाव येथे आयोजित करण्यात आलेल्या स्वाक्षरी अभियानाला नागरिकांकडून उत्स्फूर्त प्रतिसाद मिळाल्याने या मागणीला नव्याने बळ मिळाले आहे.
राज्यात मोठ्या जिल्ह्यांचे विभाजन करून नागरिकांची प्रशासकीय कामे अधिक सुलभ व्हावीत यासाठी गेल्या अनेक वर्षांपासून विविध स्तरांवर मागण्या होत आहेत. जळगाव, पुणे, नाशिक, बीड, नांदेड यांसारख्या मोठ्या जिल्ह्यांच्या विभाजनाचा प्रस्ताव यापूर्वीही चर्चेत आला होता. त्याच पार्श्वभूमीवर भुसावळला स्वतंत्र जिल्ह्याचा दर्जा देण्याची मागणी पुन्हा एकदा पुढे आली आहे.
वरणगाव येथे लोकसंघर्ष चळवळ समितीच्या वतीने राबविण्यात आलेल्या स्वाक्षरी अभियानात व्यापारी, शेतकरी, कामगार, युवक, महिला तसेच विविध सामाजिक क्षेत्रातील नागरिकांनी मोठ्या संख्येने सहभाग नोंदविला. शहरातील प्रमुख चौक, बाजारपेठ आणि सार्वजनिक ठिकाणी हे अभियान राबविण्यात आले.
नागरिकांचे म्हणणे आहे की, जळगाव जिल्ह्याचा भौगोलिक विस्तार मोठा असल्याने शासकीय कामांसाठी अनेकांना मोठ्या प्रमाणावर वेळ आणि आर्थिक खर्च करावा लागतो. अनेकदा जिल्हा मुख्यालयापर्यंत पोहोचण्यासाठी नागरिकांना मोठ्या अडचणींचा सामना करावा लागतो. त्यामुळे भुसावळ स्वतंत्र जिल्हा आणि वरणगाव स्वतंत्र तालुका झाल्यास प्रशासन अधिक लोकाभिमुख होईल आणि विकास प्रक्रियेला गती मिळेल.
मागणीकर्त्यांच्या मते, भुसावळ हे रेल्वे, व्यापार आणि औद्योगिकदृष्ट्या महत्त्वाचे केंद्र असून स्वतंत्र जिल्हा झाल्यास परिसरातील पायाभूत सुविधा, शासकीय सेवा आणि विकासकामांना चालना मिळू शकते. त्याचप्रमाणे वरणगावला स्वतंत्र तालुक्याचा दर्जा मिळाल्यास स्थानिक नागरिकांच्या दैनंदिन प्रशासकीय अडचणी कमी होतील.
दरम्यान, महसूल विभागाने यापूर्वी नवीन जिल्ह्यांच्या निर्मितीसाठी लोकसंख्या, भौगोलिक सीमा आणि प्रशासकीय निकषांचा अभ्यास आवश्यक असल्याचे स्पष्ट केले होते. त्यामुळे या मागणीबाबत शासन कोणता निर्णय घेते याकडे संपूर्ण परिसराचे लक्ष लागले आहे.
स्वाक्षरी अभियानाला मिळालेल्या मोठ्या प्रतिसादामुळे भुसावळ स्वतंत्र जिल्हा आणि वरणगाव तालुका निर्मितीची मागणी आगामी काळात अधिक तीव्र होण्याची चिन्हे दिसत असून, स्थानिक नागरिकांमध्ये या विषयावर मोठी उत्सुकता निर्माण झाली आहे.
