पालघर (प्रतिनिधी आशितोष गावंडे) : जिल्ह्यातील वाडा तालुक्यातील कोनसाईत परिसरात अनधिकृत फटाक्यांच्या फॅक्टरीत भीषण स्फोट झाल्याची धक्कादायक घटना समोर आली आहे. या दुर्घटनेत एका कामगाराचा जागीच मृत्यू झाला असून तिघेजण गंभीर जखमी झाले आहेत.
मिळालेल्या माहितीनुसार, ही फॅक्टरी अनधिकृतपणे चालवली जात असल्याची प्राथमिक माहिती आहे. स्फोट इतका भीषण होता की, फॅक्टरीचा काही भाग पूर्णपणे उद्ध्वस्त झाला असून परिसरात मोठ्या प्रमाणात नुकसान झाले आहे. घटनेनंतर परिसरात एकच खळबळ उडाली.
जखमींना तातडीने जवळच्या रुग्णालयात उपचारासाठी दाखल करण्यात आले आहे. मृतांचा आकडा वाढण्याची भीतीही व्यक्त केली जात आहे. स्थानिक प्रशासन, पोलीस आणि अग्निशमन दल घटनास्थळी दाखल झाले असून बचावकार्य सुरू आहे.
या प्रकरणी पोलिसांनी तपास सुरू केला असून, फॅक्टरी अनधिकृतपणे सुरू ठेवणाऱ्यांवर कठोर कारवाई होण्याची शक्यता आहे. तसेच, सुरक्षा नियमांचे उल्लंघन झाले का याचाही तपास केला जात आहे.
दरम्यान, या घटनेमुळे परिसरातील नागरिकांमध्ये भीतीचे वातावरण पसरले असून, प्रशासनाने अशा अनधिकृत फॅक्टऱ्यांवर तातडीने कारवाई करण्याची मागणी स्थानिकांकडून होत आहे.
