सिन्नर (प्रतिनिधी नवनाथ आव्हाड) : तालुक्यातील पूर्व भागातील नि-हाळे फत्तेपूर येथील वारकरी कुटुंबातील सुनील सुरेश केकाणे यांनी जिद्द, मेहनत आणि सातत्यपूर्ण अभ्यासाच्या जोरावर पोलिस उपनिरीक्षक (PSI) पदाला गवसणी घालत गावाचे नाव उज्ज्वल केले आहे.
श्रीराम भजनी मंडळाचे वारकरी तसेच शेतीमजुरी करून कुटुंबाचा उदरनिर्वाह करणारे ह.भ.प. सुरेश महाराज केकाणे व रंजना केकाणे यांचे सुपुत्र असलेल्या सुनील केकाणे यांनी महाराष्ट्र लोकसेवा आयोगामार्फत घेण्यात आलेल्या खात्यांतर्गत मर्यादित विभागीय पोलिस उपनिरीक्षक परीक्षेत राज्यातून १२९ वा क्रमांक मिळवून उल्लेखनीय यश संपादन केले.
सुनील केकाणे हे क्रांतीवीर वसंतराव नाईक माध्यमिक विद्यालय, नि-हाळे फत्तेपूर येथील माजी विद्यार्थी आहेत. त्यांनी प्राथमिक शिक्षण जिल्हा परिषद शाळेत तर बारावीपर्यंतचे शिक्षण ब्रह्मानंद महाविद्यालय, दोडी येथे पूर्ण केले. त्यानंतर नांदूर शिंगोटे येथील सम्राट करिअर अकॅडमीमध्ये पोलिस भरतीचे प्रशिक्षण घेत त्यांनी २०१७ मध्ये मुंबई रेल्वे पोलिस दलात प्रवेश मिळविला.
मुंबई रेल्वे कंट्रोल रूम येथे कार्यरत असताना तसेच माजी फोर्स वन कमांडो म्हणून सेवा बजावत असतानाच त्यांनी वरिष्ठ पदाचे स्वप्न उराशी बाळगले होते. कर्तव्य बजावत अभ्यासात सातत्य ठेवून त्यांनी पहिल्याच प्रयत्नात हे यश संपादन केले.
या यशामध्ये पत्नी दिपाली केकाणे, बंधू विनोद केकाणे तसेच सासरच्या नातेवाईकांचे मोलाचे सहकार्य लाभल्याचे त्यांनी सांगितले. मोठे बंधू शरद केकाणे, मुंबई पोलिस यांचेही मार्गदर्शन त्यांना लाभले.
मुंबई येथे माननीय पोलिस आयुक्त एम. राकेश कलासागर यांच्या हस्ते सुनील केकाणे यांचा सत्कार करण्यात आला. तसेच नि-हाळे फत्तेपूर ग्रामस्थ आणि क्रांतीवीर वसंतराव नाईक माध्यमिक विद्यालयाच्या वतीनेही नुकताच त्यांचा सत्कार सोहळा आयोजित करण्यात आला.
यावेळी संस्थेचे संचालक बंडूनाना भाबड, समाधान गायकवाड, सरपंच सौ. वंदना सांगळे, मुख्याध्यापक आर. बी. बच्छाव, राजेंद्र वाघ, विलास दराडे, सुरेश केकाणे, भगवान कातकाडे, साहेबराव कुटे, सुरेश कातकाडे, विष्णू सांगळे, नानासाहेब दराडे आदी मान्यवर उपस्थित होते.
