जळगाव (प्रतिनिधी विनोद पवार) : मंगरूळ येथे भीषण तिहेरी अपघात : सहा जण जागीच ठार
अमळनेर अमळनेर-धुळे रस्त्यावर मंगरूळ गावाजवळ सोमवारी (दि. ९) सकाळी सुमारे सात वाजेच्या सुमारास भीषण तिहेरी अपघात झाला. मोटरसायकल, कार आणि एसटी बस यांच्या अपघातात सहा जण जागीच ठार झाल्याने परिसरात हळहळ व्यक्त होत आहे.
मिळालेल्या माहितीनुसार, मोटरसायकल क्रमांक एमएच १८ सी ८७१९ आणि एसटी बस क्रमांक एमएच १३ सीयू ७५४० ही वाहने अमळनेरकडून धुळ्याकडे जात होती. त्याचवेळी धुळ्याकडून येणारी कार क्रमांक जीजे १९ एएफ ३१४७ ही भरधाव वेगात येऊन एसटी बस आणि मोटरसायकलला जोरदार धडकली.
अपघात इतका भीषण होता की मोटरसायकलचा पूर्ण चेंदामेंदा झाला असून धरणगाव येथील मोटरसायकलस्वार जागीच ठार झाला. तसेच कारमधील महिला व पुरुष मिळून एकूण सहा जणांचा जागीच मृत्यू झाला.
मृतांमध्ये गुजरातमधील व्यारा येथील आदित्य चंद्रकांत महाजन, अनिता सुरेश महाजन, निर्मला नंदलाल महाजन, नंदलाल गोपाल महाजन आणि सुरेश विक्रम महाजन यांचा समावेश असून हे सर्वजण साखरपुड्याच्या कार्यक्रमासाठी अमळनेर येथे येत होते.
११२ आपत्कालीन सेवांची तत्पर कारवाई
अपघाताची माहिती मिळताच ११२ आपत्कालीन सेवेला संपर्क करण्यात आला. त्यानंतर पोलीस निरीक्षक दत्तात्रय निकम, हेडकॉन्स्टेबल कैलास शिंदे, रवी पाटील तसेच पोलीस पाटील भागवत पाटील घटनास्थळी दाखल झाले.
जखमींना १०८ रुग्णवाहिकेद्वारे उपचारासाठी रवाना करण्यात आले. कारमध्ये एक लहान मुलगा अडकून पडला होता. गावकरी, पोलीस आणि एसटी कर्मचाऱ्यांच्या मदतीने त्याला सुरक्षित बाहेर काढण्यात आले. अपघातात एसटीमधील दीपक दिलीप पाटील हे जखमी झाले आहेत.
मृतदेह शवविच्छेदनासाठी ग्रामीण रुग्णालयात पाठविण्यात आले असून पुढील तपास पोलीस करीत आहेत.
