ब्रह्मपुरी (प्रतिनिधी रुपेश देशमुख) : ब्रह्मपुरी शहरातील छत्रपती शिवाजी महाराज चौक परिसरातील प्रशासकीय कार्यालयाच्या मागे नव्याने सुरू करण्यात आलेली ई-लायब्ररी विद्यार्थी आणि नागरिकांच्या ज्ञानसाधनेसाठी अत्यंत उपयुक्त ठरत आहे. या अत्याधुनिक डिजिटल ग्रंथालयाला ‘छत्रपती शिवाजी महाराज ई-ग्रंथालय’ असे नाव देण्यात यावे, अशी मागणी शिवसेनेच्या वतीने करण्यात आली आहे. या संदर्भातील सविस्तर निवेदन ब्रह्मपुरीचे उपविभागीय अधिकारी, नगर परिषदेचे मुख्याधिकारी आणि नगराध्यक्ष योगेश मिसार यांना सोपविण्यात आले.
शिवसेना शहर प्रमुख अमोल माकोडे यांच्या नेतृत्वाखाली हे निवेदन देण्यात आले. आजच्या डिजिटल युगात तरुण पिढीला छत्रपती शिवाजी महाराजांच्या आदर्श विचारांची आणि प्रगतीशील दृष्टिकोनाची प्रेरणा मिळणे गरजेचे आहे. शिवराय हे केवळ एक महान योद्धे नव्हते, तर ते अठरा पगड जातींच्या सर्वसामान्य जनतेला न्याय देणारे एक उत्तम प्रशासक, दूरदृष्टी असलेले राजे आणि अद्वितीय ज्ञानाचे पुरस्कर्ते होते, असे निवेदनात स्पष्ट करण्यात आले आहे.
छत्रपती शिवाजी महाराजांच्या अस्तित्वाचा आणि त्यांच्या लोककल्याणकारी कार्याच्या प्रभावातूनच महात्मा ज्योतिबा फुले, छत्रपती शाहू महाराज आणि महामानव डॉ. बाबासाहेब आंबेडकर यांनी आपली वाटचाल समृद्ध केली. या ई-लायब्ररीचा मुख्य उद्देश डिजिटल साक्षरता आणि ज्ञानाचा प्रसार करणे हाच आहे. त्यामुळे या वास्तूला शिवरायांचे नाव दिल्यास ते सर्वांसाठीच अत्यंत अभिमानास्पद आणि प्रेरणादायी ठरेल, असे अमोल माकोडे यांनी सांगितले.
निवेदन देताना शिवसेनेचे उपजिल्हा प्रमुख संजय पारटवार, तालुका प्रमुख नरेंद्र नरड, युवासेना तालुका प्रमुख आकाश शेंद्रे, उपतालुका प्रमुख कवळू पिंपळकर, सामाजिक कार्यकर्ते डॉ. सागर माकडे, सुरज माकडे, आशिष गांडलेवार, राकेश भुते, अंकुश भागडकर, गणेश लांजेवार, अनुराग तोंडासे यांच्यासह मोठ्या संख्येने शिवसैनिक उपस्थित होते. या रास्त मागणीवर नगर परिषद प्रशासन काय निर्णय घेते, याकडे आता नागरिकांचे लक्ष लागले आहे.
