दौंड, (प्रतिनिधी-मयुर साळवे,संघराज गायकवाड): दौंड शहर व परिसरात कर्णकर्कश आवाज करणाऱ्या मॉडिफाईड सायलेंसरयुक्त बुलेट व मोटारसायकलींवर दौंड पोलिसांनी विशेष मोहीम राबवत धडक कारवाई केली. या कारवाईत एकूण १९ बुलेट व मोटारसायकलींची तपासणी करून त्यांवरील मॉडिफाईड सायलेंसर काढून टाकण्यात आले, तसेच संबंधित वाहनधारकांवर मोटार वाहन कायद्यानुसार दंडात्मक कारवाई करण्यात आली.
दौंड पोलीस स्टेशनच्या हद्दीत काही वाहनचालकांनी मूळ सायलेंसरमध्ये बदल करून मोठा व कर्णकर्कश आवाज करणारे सायलेंसर बसविल्याच्या तक्रारी पोलिसांकडे प्राप्त झाल्या होत्या. या वाहनांमुळे सर्वसामान्य नागरिक, विद्यार्थी, ज्येष्ठ नागरिक तसेच रुग्णांना त्रास सहन करावा लागत होता. यामुळे सार्वजनिक शांतता व सुव्यवस्थेचा प्रश्न निर्माण होत असल्याने पोलीस निरीक्षक हेमंत शेडगे यांच्या मार्गदर्शनाखाली विशेष मोहीम हाती घेण्यात आली.
मोहिमेदरम्यान संशयित वाहनांची तपासणी करण्यात आली. तपासणीत नियमबाह्य मॉडिफाईड सायलेंसर आढळून आलेल्या वाहनांवर तत्काळ कारवाई करण्यात आली. संबंधित वाहनधारकांना भविष्यात अशा प्रकारचे बेकायदेशीर बदल न करण्याच्या सूचना देखील देण्यात आल्या.
यावेळी पोलीस निरीक्षक हेमंत शेडगे यांनी वाहनधारकांना आवाहन केले की, वाहनांमध्ये नियमबाह्य बदल करून ध्वनीप्रदूषण निर्माण करू नये. मोटार वाहन कायद्याचे उल्लंघन करणाऱ्यांविरुद्ध यापुढेही अशाच प्रकारच्या कठोर कारवाया सातत्याने सुरू राहणार असल्याचा इशाराही त्यांनी दिला.
