गेवराई तालुका:(प्रतिनिधी विष्णु गायकवाड)भारत निवडणूक आयोगाच्या निर्देशानुसार सुरू असलेल्या विशेष संक्षिप्त पुनरीक्षण ( एस . आय . आर . ) २०२६ अभियानाला बीड जिल्ह्यात वेग आला असून जिल्हाधिकारी तथा जिल्हा निवडणूक अधिकारी विवेक जॉन्सन यांच्या मार्गदर्शनाखाली संपूर्ण जिल्ह्यात घराघरात जाऊन गणना प्रपत्र भरून घेण्याची मोहीम प्रभावीपणे राबविण्यात येत आहे .
प्रशिक्षणार्थी आयएएस दिव्यांक गुप्ता , अपर जिल्हाधिकारी हरीश धार्मिक , उपजिल्हा निवडणूक अधिकारी मनोज घोडे पाटील , उपविभागीय अधिकारी तथा मतदार नोंदणी अधिकारी कविता जाधव यांच्या समन्वयातून महसूल व निवडणूक यंत्रणा युद्धपातळीवर कार्यरत असून प्रत्येक पात्र मतदारापर्यंत पोहोचण्याचा प्रयत्न सुरू आहे . काही दिवसांपूर्वी जिल्हाधिकारी विवेक जॉन्सन यांनी स्वतः विविध भागांना भेटी देऊन या मोहिमेचा शुभारंभ करत प्रत्यक्ष पाहणी केली होती . त्यानंतर जिल्हाभरात या अभियानाला अधिक गती मिळाली आहे .
प्रशासनाच्या नियोजनबद्ध प्रयत्नांमुळे ग्रामीण तसेच शहरी भागात बूथस्तरीय अधिकारी ( बी . एल . ओ . ) यांच्या मदतीसाठी स्वस्त धान्य दुकानदार , ग्राम रोजगार सेवक , महसूल सेवक , बूथस्तरीय अधिकारी सहाय्यक तसेच स्थानिक प्रशासनातील कर्मचारी यांची नियुक्ती करण्यात आली आहे . त्यामुळे घराघरात पोहोचून गणना प्रपत्र वितरित करणे , माहिती पडताळणी करणे , आवश्यक कागदपत्रांची पूर्तता करून घेणे आणि नागरिकांच्या शंकांचे निरसन करणे हे काम अधिक वेगाने सुरू आहे . लोकसहभाग वाढावा यासाठी गावपातळीवर जनजागृती मोहीमही राबविण्यात येत आहे .
दि . ५ जुलै २०२६ रोजी रात्री १० . ०० वाजेपर्यंतच्या आकडेवारीनुसार बीड जिल्ह्यातील २१ लाख ९३ हजार ८२७ मतदारांपैकी २ लाख ८४ हजार ७० मतदारांना गणना प्रपत्रांचे वितरण करण्यात आले असून हे प्रमाण १२ . ९५ टक्के इतके आहे . त्यापैकी ४३ हजार ९०१ गणना प्रपत्रांचे संगणकीकरण पूर्ण झाले असून २ . ०० टक्के काम पूर्ण झाले आहे . ४३ हजार ५२७ प्रपत्रांची बूथस्तरीय अधिकाऱ्यांकडून पडताळणी पूर्ण झाली असून केवळ ३७४ प्रपत्रे मतदारांकडून भरून देण्यात आली असली तरी त्यांची पडताळणी अद्याप शिल्लक आहे . प्रशासनाने ही प्रगती समाधानकारक असल्याचे सांगितले असून पुढील काही दिवसांत हे अभियान अधिक वेगाने राबविण्यात येणार आहे .
दरम्यान , बीड तालुक्यातील विविध गावांमध्ये महसूल व निवडणूक यंत्रणेच्या माध्यमातून विशेष जनजागृती करण्यात येत असून ग्रामसभा , बैठका , प्रत्यक्ष घरभेटी आणि स्थानिक लोकप्रतिनिधींच्या सहभागातून नागरिकांना गणना प्रपत्र अचूक भरून देण्याचे आवाहन करण्यात येत आहे . प्रत्येक मतदाराने आपले नाव , पत्ता , जन्मतारीख , भ्रमणध्वनी क्रमांक , कुटुंबाचा तपशील , आवश्यक कागदपत्रे आणि अद्ययावत छायाचित्र उपलब्ध करून देत बूथस्तरीय अधिकारी ( बी . एल . ओ . ) यांना सहकार्य करावे , असे आवाहन प्रशासनाच्या वतीने करण्यात आले आहे .
जिल्हाधिकारी विवेक जॉन्सन यांनी नागरिकांना आवाहन करताना सांगितले की , अचूक , पारदर्शक आणि सर्वसमावेशक मतदार यादी तयार करणे ही लोकशाही बळकट करण्याची अत्यंत महत्त्वाची प्रक्रिया आहे . प्रत्येक पात्र मतदारापर्यंत पोहोचून कोणताही मतदार वंचित राहणार नाही , यासाठी प्रशासन कटिबद्ध असून सर्व नागरिकांनी या अभियानात सक्रिय सहभाग नोंदवावा . प्रशासन , महसूल विभाग , बूथस्तरीय अधिकारी , सहाय्यक कर्मचारी आणि स्थानिक स्वराज्य संस्थांच्या संयुक्त प्रयत्नातून बीड जिल्ह्यातील विशेष संक्षिप्त पुनरीक्षण ( एस . आय . आर . ) मोहीम यशस्वी करण्यासाठी सर्वांनी सहकार्य करावे , असे आवाहनही त्यांनी केले .
