गेवराई (प्रतिनीधी विष्णु गायकवाड):
जगदंबा व जयभवानी शिक्षण प्रसारक मंडळाच्या कॉलेज ऑफ बी. फार्मसी, शिवाजीनगर गढी येथील प्राचार्य डॉ. महारूद राख यांची आकाशवाणी केंद्र बीडने बी. फार्मसी क्षेत्रातील तज्ज्ञ म्हणून विशेष मुलाखतीसाठी निवड केली आहे. आकाशवाणी केंद्राच्या निवेदिका श्रीमती सुप्रभा जोशी यांनी त्यांची मुलाखत घेतली. या मुलाखतीत बी. फार्मसी शिक्षणाचे महत्त्व, विद्यार्थ्यांसाठी उपलब्ध करिअरच्या संधी, प्रवेश प्रक्रिया, औषधनिर्माण क्षेत्रातील रोजगाराच्या वाढत्या संधी तसेच ग्रामीण भागातील विद्यार्थ्यांनी या क्षेत्रात करिअर घडविण्यासाठी आवश्यक असलेले मार्गदर्शन यावर सविस्तर चर्चा करण्यात आली.
या विशेष मुलाखतीचे प्रसारण गुरुवार, दि. 9 जुलै 2026 रोजी सकाळी 10.30 ते 11.00 या वेळेत आकाशवाणी केंद्र बीडवर होणार आहे. बीड जिल्ह्यातील तसेच परिसरातील बी. फार्मसीमध्ये प्रवेश घेऊ इच्छिणाऱ्या विद्यार्थी, पालक आणि युवकांनी हा मार्गदर्शनपर कार्यक्रम आवर्जून ऐकावा, असे आवाहन आकाशवाणी केंद्र बीडच्या वतीने करण्यात आले आहे.
कॉलेज ऑफ बी. फार्मसीच्या प्राचार्य डॉ. महारूद राख यांची बी. फार्मसी क्षेत्रातील तज्ज्ञ म्हणून आकाशवाणी केंद्र बीडने निवड केल्याबद्दल संस्थेचे अध्यक्ष अमरसिंह पंडित, सचिव जयभाऊ पंडित तसेच रणवीर काका पंडित यांनी त्यांचे अभिनंदन केले. त्यांच्या या निवडीमुळे संस्थेच्या शैक्षणिक कार्याचा गौरव झाला असून, ग्रामीण भागातील विद्यार्थ्यांना गुणवत्तापूर्ण शिक्षण आणि करिअरविषयक योग्य दिशा मिळण्यास निश्चितच मदत होईल, असा विश्वास संस्थेच्या पदाधिकाऱ्यांनी व्यक्त केला.
