पांगरा येथील बनामाई गोशाळेला विहिप राष्ट्रीय प्रवक्त्याची सदिच्छा भेट

जिल्हा:(प्रतिनिधी ज्ञानेश्वर जाधवपातूर) तालुक्यातील पांगरा येथील बनामाई गोशाळा व गोविज्ञान अनुसंधान केंद्र येथे विश्व हिंदू परिषदेचे राष्ट्रीय प्रवक्ते शंकरजी गायकर तसेच विदर्भ प्रांत गोरक्षा प्रमुख अतुलजी आयाचित यांनी बुधवारी सदिच्छा भेट देऊन गोशाळेची पाहणी केली.
विश्व हिंदू परिषदेच्या गोरक्षा अभियानांतर्गत दत्तक घेण्यात आलेल्या १४ गोशाळा प्रकल्पांपैकी बनामाई गोशाळेचा समावेश असून, या गोशाळेतील व्यवस्थापन, स्वच्छता व गोसेवेचे कार्य पाहून मान्यवरांनी समाधान व्यक्त केले. अवघ्या सुमारे ४०० लोकसंख्या असलेल्या पांगरा गावात कोणतेही शासकीय अनुदान न घेता सुमारे २५० हून अधिक गोमातांचे संगोपन केले जात असल्याचे पाहून शंकरजी गायकर यांनी गोशाळेच्या कार्याचे भरभरून कौतुक केले.
ट्रस्टच्या सहकार्याने उभारण्यात आलेल्या गोशाळेतील शेड, गोमातांच्या देखभालीसाठी उपलब्ध करून देण्यात आलेल्या सुविधा तसेच सेवाभावी कार्याचीही त्यांनी प्रशंसा केली. ग्रामीण भागात अशा प्रकारे समाजसहभागातून उभारण्यात आलेले गोसेवेचे कार्य प्रेरणादायी असल्याचे त्यांनी यावेळी नमूद केले.
यावेळी गोशाळेच्या संचालिका सौ. दिपाली अनिल कराळे, प्रा. अनिल कराळे तसेच महिला गोसेवा समितीच्या सदस्य उपस्थित होत्या.
– टाइम्स ऑफ महाराष्ट्र न्यूज साठी