दौंड,(प्रतिनिधी-मयुर साळवे, संघराज गायकवाड) दौंड शहरातील मोकाट जनावरे पकडण्याच्या कामाचे कंत्राट घेतलेल्या ठेकेदाराविरुद्ध 53 गाई-बैलांचा अपहार केल्याप्रकरणी दौंड पोलीस ठाण्यात गुन्हा दाखल करण्यात आला आहे.
याप्रकरणी दौंड नगरपरिषदेचे मुख्याधिकारी अवधूत साहेबराव तावडे (वय 43) यांनी फिर्याद दिली आहे. त्यावरून किरण नितीन वांबिरे (रा. गांधी चौक, दौंड, ता. दौंड, जि. पुणे) यांच्याविरुद्ध भारतीय न्याय संहिता (BNS) कलम 316(5) अन्वये गुन्हा नोंद करण्यात आला आहे.
पोलिसांनी दिलेल्या माहितीनुसार, दिनांक 9 फेब्रुवारी 2026 ते 16 फेब्रुवारी 2026 या कालावधीत संबंधित ठेकेदाराने दौंड शहरातील मोकाट फिरणाऱ्या एकूण 53 गाई-बैलांना पकडल्याची नोंद आहे. मात्र ही जनावरे सुरक्षितपणे गोशाळेत जमा करण्यात आली की नाही, याबाबत शंका निर्माण झाली आहे.
फिर्यादीनुसार, ठेकेदाराने नगरपरिषदेने दिलेल्या कंत्राटाचा तसेच जनावरांच्या कायदेशीर ताब्याचा गैरफायदा घेत 53 गाई-बैलांचा बेकायदेशीरपणे अपहार केल्याचा आरोप करण्यात आला आहे.
या प्रकरणाचा पुढील तपास सहायक पोलीस निरीक्षक विनायक सपाटे करत आहेत. गुन्हा पोलीस नाईक रोटे यांनी दाखल केला आहे.
