पुण्यात घरगुती वादातून पत्नीची निर्घृण हत्या; पतीसह तीन जणांवर खुनाचा गुन्हा.

 Times Of Maharashtra Desk  : पुणे शहरात घरगुती वादातून पतीने पत्नीच्या डोक्यावर जड वस्तूने वार करून तिची हत्या केल्याची संतापजनक घटना उघडकीस आली आहे. घटनेनंतर हा प्रकार अपघात असल्याचे भासवून पोलिसांची दिशाभूल करण्याचा तसेच घटनास्थळी सांडलेले रक्त साफ करून पुरावे नष्ट करण्याचा प्रयत्न करण्यात आल्याचे तपासात समोर आले आहे. या प्रकरणी पतीसह त्याच्या दोन नातेवाईकांविरोधात खुनाचा व पुरावे नष्ट केल्याचा गुन्हा दाखल करण्यात आला आहे.

मृत महिलेचे नाव वैष्णवी तुषार तुपसुंदर (वय २३) असे असून तिचा पती तुषार उर्फ गणेश विलास तुपसुंदर (वय २८, रा. भवानी पेठ, हरकरनगर) यानेच तिची हत्या केल्याचा आरोप आहे. तसेच, पुरावे नष्ट करण्यास मदत केल्याप्रकरणी मनोज रोहिदास कांबळे (वय ३९, रा. भवानी पेठ, कशेवाडी) आणि वनिता मनोज कांबळे (वय ३२) यांच्यावरही गुन्हा दाखल करण्यात आला आहे.

डोक्यावर दोन ते तीन वेळा जोरदार वार

पोलिसांनी दिलेल्या माहितीनुसार, विवाहानंतर तुषार आणि वैष्णवी यांच्यात वारंवार कौटुंबिक वाद होत होते. दोन दिवसांपूर्वी हा वाद तीव्र भांडणात बदलला. या भांडणादरम्यान रागाच्या भरात तुषारने घरातील जड व टणक वस्तूने वैष्णवीच्या डोक्यावर दोन ते तीन वेळा जोरदार वार केले. यात ती गंभीर जखमी झाली.

यानंतर वैष्णवीला चक्कर येऊन ती पडल्याचे सांगत शेजाऱ्यांच्या मदतीने तिला तातडीने ससून रुग्णालयात दाखल करण्यात आले. मात्र डोक्याला झालेल्या गंभीर दुखापतीमुळे उपचार सुरू असतानाच तिचा मृत्यू झाला. सुरुवातीला हा प्रकार अपघात असल्याचा दावा करण्यात आला होता.

पुरावे नष्ट करण्याचा प्रयत्न

दरम्यान, आरोपी तुषारच्या नातेवाईकांनी घटनास्थळी सांडलेले रक्त पुसून काढत पुरावे नष्ट करण्याचा प्रयत्न केल्याचे तपासात निष्पन्न झाले आहे. पोलिसांच्या माहितीनुसार, मनोज कांबळे हा घराच्या दरवाजाजवळ उभा राहून कोणी येते का यावर लक्ष ठेवत होता, तर वनिता कांबळे हिने घरातील फरशीवरील रक्ताचे डाग साफ केले.

शेजाऱ्यांची चौकशी, घटनास्थळाची पाहणी तसेच वैद्यकीय अहवालाच्या आधारे पोलिसांनी सखोल तपास केला असता, हा प्रकार अपघात नसून सत्य लपवण्याचा सुनियोजित प्रयत्न असल्याचे स्पष्ट झाले. वैष्णवीच्या डोक्याला झालेल्या जखमा सामान्य पडण्यामुळे होऊ शकत नसल्याचे डॉक्टरांनी स्पष्ट केले आहे. या प्रकरणी खडक पोलीस ठाण्यात तिघांविरोधात खुनाचा व पुरावे नष्ट केल्याचा गुन्हा दाखल करण्यात आला असून, पुढील तपास पोलीस करत आहेत.