विनोद पवार (जळगाव प्रतिनिधी) : शहरात एकाच रात्री दोन वाईन शॉप फोडून लाखो रुपयांची रोकड लंपास करणाऱ्या सराईत चोरट्याला स्थानिक गुन्हे शाखा पोलिसांनी अवघ्या १२ तासांत अटक करून मोठी आणि कौतुकास्पद कामगिरी बजावली आहे. या जलद कारवाईमुळे व्यापारी वर्गाने सुटकेचा श्वास घेतला आहे.
दि. १९ फेब्रुवारी २०२६ रोजी रात्री जिल्हापेठ पोलीस स्टेशन हद्दीतील भजे गल्ली येथील प्रिन्स वाईन शॉपचे शटर तोडून अज्ञात चोरट्याने दुकानातील कपाटातून सुमारे २ लाख ५० हजार रुपये रोख रक्कम चोरून नेली होती. याच रात्री एमआयडीसी पोलीस स्टेशन हद्दीतील अजिंठा चौफुली परिसरात असलेल्या राज वाईन्सचे शटर फोडून तब्बल ३ लाख २५ हजार रुपये रोख रक्कम लंपास करण्यात आली होती.
एकाच रात्री दोन मोठ्या चोरीच्या घटनांमुळे शहरातील व्यापाऱ्यांमध्ये भीतीचे वातावरण पसरले होते. या प्रकरणी जिल्हापेठ व एमआयडीसी पोलीस ठाण्यात गुन्हे दाखल करण्यात आले होते.
घटनेचे गांभीर्य लक्षात घेऊन स्थानिक गुन्हे शाखेच्या पथकाने तांत्रिक विश्लेषण, सीसीटीव्ही फुटेज व गोपनीय माहितीच्या आधारे तपासाची सूत्रे वेगाने हलवली. अथक प्रयत्नांनंतर संशयित आरोपीला अवघ्या १२ तासांत ताब्यात घेण्यात पोलिसांना यश आले.
आरोपीकडून गुन्ह्यात वापरलेली मोटारसायकल, तसेच चोरीस गेलेला काही मुद्देमाल जप्त करण्यात आला आहे. पुढील तपास सुरू असून आरोपीकडून आणखी गुन्ह्यांचा उलगडा होण्याची शक्यता पोलिसांनी व्यक्त केली आहे.
या जलद आणि प्रभावी कारवाईबद्दल व्यापारी वर्गाने पोलिस प्रशासनाचे कौतुक केले असून, शहरातील कायदा-सुव्यवस्थेवरील विश्वास अधिक दृढ झाला आहे.
