विनोद पवार (जळगाव जिल्हा प्रतिनिधी) : जळगाव शहर महानगरपालिकेअंतर्गत अत्यंत महत्त्वाच्या मानल्या जाणाऱ्या स्थायी समिती व महिला व बालकल्याण समितीच्या सभापती पदांसाठी गुरुवारी (दि. २६ फेब्रुवारी) उमेदवारी अर्ज दाखल करण्याची प्रक्रिया पार पडली. दोन्ही पदांसाठी प्रत्येकी एकच अर्ज प्राप्त झाल्याने निवडणूक प्रक्रिया आता केवळ औपचारिकता राहिली असून संबंधित उमेदवारांची बिनविरोध निवड निश्चित झाली आहे. अधिकृत घोषणेची औपचारिकता लवकरच पूर्ण होणार आहे.
स्थायी समिती सभापतीपदी डॉ. चंद्रशेखर पाटील
स्थायी समिती सभापतीपदासाठी भारतीय जनता पक्ष तर्फे डॉ. चंद्रशेखर शिवाजी पाटील यांनी एकमेव अर्ज दाखल केला. त्यांच्या विरोधात अन्य कोणताही अर्ज दाखल न झाल्याने त्यांची निवड निश्चित मानली जात आहे.
महापालिकेतील आर्थिक तरतुदी, विकासकामांचे नियोजन, निधी मंजुरी, करप्रणाली आणि विविध प्रशासकीय निर्णयांमध्ये स्थायी समितीची भूमिका अत्यंत महत्त्वाची असते. त्यामुळे डॉ. पाटील यांच्या निवडीमुळे महापालिकेतील आर्थिक आणि विकासात्मक निर्णयप्रक्रियेला नवे नेतृत्व मिळणार असल्याची चर्चा आहे. भाजप कार्यकर्त्यांमध्ये या निवडीमुळे उत्साहाचे वातावरण निर्माण झाले आहे.
महिला व बालकल्याण समिती सभापतीपदी सिंधुताई कोल्हे
महिला व बालकल्याण समिती सभापतीपदासाठी शिवसेना तर्फे ज्येष्ठ नगरसेविका सिंधुताई विजय कोल्हे यांनी अर्ज सादर केला. त्यांच्या विरोधातही अन्य कोणताही अर्ज दाखल झाला नाही.
सामाजिक क्षेत्रातील त्यांचा दीर्घ अनुभव, महिला सक्षमीकरण व बालकल्याण विषयांवरील कामाचा ठसा लक्षात घेता महिला आघाडीत समाधानाचे वातावरण आहे. महिला व बालकल्याण समितीमार्फत विविध शासकीय योजना, महिला संरक्षण उपक्रम, बालकांच्या आरोग्य व शिक्षणासंदर्भातील कार्यक्रमांची अंमलबजावणी केली जाते. त्यामुळे या समितीच्या नेतृत्वाची जबाबदारी महत्त्वपूर्ण मानली जाते.
अर्ज दाखल करताना उत्साहपूर्ण वातावरण
दोन्ही उमेदवारांनी आपले अर्ज नगरसचिव सतीश शुक्ला यांच्याकडे सुपूर्द केले. अर्ज दाखल प्रक्रियेदरम्यान महापालिकेत उत्साहपूर्ण वातावरण पाहायला मिळाले. यावेळी भाजप व शिवसेनेचे पदाधिकारी, नगरसेवक तसेच संबंधित समित्यांचे सदस्य मोठ्या संख्येने उपस्थित होते.
आगामी धोरणांवर परिणाम?
दोन्ही महत्त्वाच्या समित्यांचे नेतृत्व अनुक्रमे डॉ. चंद्रशेखर पाटील आणि सिंधुताई कोल्हे यांच्या हाती जाणे निश्चित झाल्याने महापालिकेच्या आगामी धोरणात्मक निर्णयांवर या निवडीचा मोठा परिणाम होणार असल्याची चर्चा राजकीय वर्तुळात रंगू लागली आहे.
शहरातील प्रलंबित विकासकामे, आर्थिक नियोजन, तसेच महिला व बालकल्याणाशी संबंधित विविध उपक्रमांना गती मिळेल, अशी अपेक्षा व्यक्त केली जात आहे. अधिकृत घोषणेनंतर दोन्ही नव्या सभापतींकडून कार्याचा आराखडा जाहीर होण्याची शक्यता आहे.
