विनोद पवार (जळगाव प्रतिनिधी) : चोपडा शहरात अवैध सावकारीच्या वाढत्या जाचामुळे एका तरुणाने गळफास घेऊन आत्महत्या केल्याची धक्कादायक घटना उघडकीस आली आहे. योगेश सुनील चौधरी (वय अंदाजे २५) असे मृत तरुणाचे नाव असून, २५ तारखेला सायंकाळी सहाच्या सुमारास त्याने राहत्या घरी गळफास घेऊन आपले जीवन संपविले. या घटनेमुळे परिसरात तीव्र संताप आणि हळहळ व्यक्त केली जात आहे.
२० हजारांच्या कर्जावर २ लाखांची वसुली
मिळालेल्या माहितीनुसार, योगेश हा हातमजुरी करून आपल्या कुटुंबाचा उदरनिर्वाह करत होता. घरची आर्थिक परिस्थिती अत्यंत हलाखीची असल्याने त्याने काही महिन्यांपूर्वी पिंटू नावाच्या व्यक्तीकडून २० हजार रुपये उसने घेतले होते. मात्र, या अल्प रकमेच्या बदल्यात संबंधित सावकाराने अवाजवी व्याज आकारत आतापर्यंत सुमारे २ लाख रुपये वसूल केल्याची माहिती समोर आली आहे.
तरीही आणखी पैशांची मागणी करत वारंवार धमक्या दिल्या जात होत्या. कर्ज फेडूनही व्याजाच्या नावाखाली सुरू असलेली ही वसुली आणि मानसिक छळ यामुळे योगेश प्रचंड तणावाखाली होता, अशी माहिती नातेवाईकांनी दिली.
मृत्यूपूर्वी सुसाईड नोटमध्ये व्यथा
घटनास्थळी पोलिसांना योगेशच्या खिशात एक सुसाईड नोट आढळून आली. या चिठ्ठीत संबंधित सावकाराच्या जाचाचा स्पष्ट उल्लेख करण्यात आला आहे. केवळ पैशांसाठीच नव्हे, तर मारहाण, शिवीगाळ आणि धमक्या दिल्याचेही त्याने नमूद केले आहे. “पिंटूला कडक शिक्षा द्यावी,” अशी मागणी त्याने आपल्या शेवटच्या पत्रात केली असल्याचे समजते.
या पत्रामुळे प्रकरणाला अधिक गंभीर वळण मिळाले असून पोलिसांकडून तपासाला वेग देण्यात आला आहे.
कुटुंबावर दुःखाचा डोंगर
योगेशच्या पश्चात आई-वडील आणि एक भाऊ असा परिवार आहे. कुटुंबातील कर्ता मुलगा गमावल्याने घरावर दुःखाचा डोंगर कोसळला आहे. घटनेनंतर परिसरात शोककळा पसरली असून नागरिकांनी अवैध सावकारीच्या वाढत्या प्रकारांवर कठोर कारवाई करण्याची मागणी केली आहे.
पोलिस तपास सुरू
स्थानिक पोलिसांनी घटनास्थळी पंचनामा करून मृतदेह शवविच्छेदनासाठी पाठविला आहे. सुसाईड नोटच्या आधारे संबंधित सावकाराविरोधात गुन्हा दाखल करण्याची प्रक्रिया सुरू असून, दोषींवर कठोर कारवाई करण्याचे संकेत पोलिस प्रशासनाने दिले आहेत.
दरम्यान, या घटनेमुळे शहरात संतापाचे वातावरण निर्माण झाले असून अवैध सावकारीच्या वाढत्या विळख्याविरुद्ध प्रशासनाने तातडीने ठोस पावले उचलावीत, अशी जोरदार मागणी नागरिकांकडून होत आहे.
