वाजे विद्यालयाच्या सुसज्ज सभागृहासाठी रोटरी क्लब ऑफ नाशिकचे मोलाचे योगदान

सिन्नर (प्रतिनिधी नवनाथ आव्हाड): मराठा विद्या प्रसारक समाजाच्या लोकनेते शंकरराव बाळाजी वाजे विद्यालयातील विद्यार्थ्यांच्या सर्वांगीण विकासासाठी आवश्यक असलेल्या सुसज्ज सभागृहाच्या उभारणीत रोटरी क्लब ऑफ नाशिकचे योगदान मोलाचे ठरले आहे. या सभागृहामुळे विद्यालयाच्या शैक्षणिक, सांस्कृतिक व सामाजिक उपक्रमांना नवे व्यासपीठ उपलब्ध झाले आहे.
विद्यार्थ्यांसाठी आधुनिक सुविधांनी सुसज्ज सभागृहाची गरज लक्षात घेऊन रोटरी क्लबने सामाजिक बांधिलकी जपत आर्थिक सहकार्य केले. या सभागृहात विज्ञान प्रदर्शन, वक्तृत्व स्पर्धा, मार्गदर्शन शिबिरे, कार्यशाळा, पालक मेळावे तसेच विविध सांस्कृतिक कार्यक्रमांचे आयोजन होणार असून शेकडो विद्यार्थ्यांना त्याचा लाभ मिळणार आहे.
सिन्नर तालुका संचालक कृष्णाजी भगत यांनी रोटरी क्लबच्या उपक्रमाचे कौतुक करताना समाजातील संस्था व दानशूर व्यक्तींच्या सहकार्यामुळे शैक्षणिक विकासाला चालना मिळत असल्याचे सांगितले. मुख्याध्यापक रामनाथ रायते यांनीही या योगदानामुळे विद्यार्थ्यांच्या सर्वांगीण विकासास मोठी मदत होणार असल्याचे नमूद केले.
कार्यक्रमाची प्रस्तावना माजी मुख्याध्यापक बाळासाहेब देशमुख यांनी केली. प्रमुख पाहुण्यांचा परिचय सोमनाथ वाघ यांनी करून दिला. सूत्रसंचालन जितेंद्र शिंदे यांनी तर आभार प्रदर्शन रावसाहेब आढाव यांनी केले.
कार्यक्रमास रोटरी क्लबचे उपप्रांतपाल मुरली राघवन, जेके मैनी प्रोसिजर टेक्नॉलॉजी लिमिटेडचे सीओओ कमलाकर टाक यांच्यासह विविध मान्यवर, शिक्षक, शिक्षकेतर कर्मचारी, विद्यार्थी व पालक मोठ्या संख्येने उपस्थित होते. अध्यक्षस्थानी डॉ. गौरव सामनेरकर होते.