८ वर्षीय अल्पवयीन मुलीवरील बलात्कार व खुनाच्या गुन्ह्यात आरोपीला मरेपर्यंत फाशीची शिक्षा

पालघर : डहाणू पोलीस ठाणे हद्दीत ८ वर्षीय अल्पवयीन मुलीवर बलात्कार करून तिची हत्या केल्याच्या गंभीर गुन्ह्यातील आरोपीला पालघर येथील अपर जिल्हा व सत्र न्यायालयाने मरेपर्यंत फाशीची शिक्षा सुनावली आहे. या निर्णयामुळे गंभीर स्वरूपाच्या गुन्ह्यांमध्ये न्यायालयाने कठोर भूमिका घेतल्याचे स्पष्ट झाले आहे.
डहाणू पोलीस ठाण्यात गु.र.क्र. १८५/२०२३ अन्वये भा.दं.वि. कलम ३७६, ३७७, ३०२, ३०७ तसेच बालकांचे लैंगिक अत्याचारापासून संरक्षण अधिनियम (POCSO) २०१२ मधील संबंधित कलमांनुसार गुन्हा दाखल करण्यात आला होता. आरोपीने २७ सप्टेंबर २०२३ रोजी वांगणपाडा, वाणगणवाडा परिसरातील झाडाझुडपात ८ वर्षीय मुलीवर लैंगिक अत्याचार केल्यानंतर तिच्या डोक्याच्या पाठीमागे व तोंडावर वार करून तिची हत्या केल्याचे तपासात निष्पन्न झाले.
या प्रकरणाचा तपास तत्कालीन उपविभागीय पोलीस अधिकारी नित्यानंद झा यांनी केला. त्यांनी आरोपीविरुद्ध भक्कम पुरावे गोळा करून पालघर येथील अपर जिल्हा व सत्र न्यायालयात दोषारोपपत्र दाखल केले.
न्यायालयाने एकूण २४ साक्षीदारांची साक्ष तपासल्यानंतर आरोपीविरुद्धचा गुन्हा सिद्ध झाल्याचे नमूद करत भादंवि कलम ३०२, ३०६, ३०७ तसेच POCSO कायद्यानुसार मरेपर्यंत फाशीची शिक्षा आणि ७५ हजार रुपयांचा दंड ठोठावला. दंड न भरल्यास अतिरिक्त कारावासाची शिक्षाही सुनावण्यात आली आहे.
या प्रकरणात विशेष सरकारी वकील रेखा हिवराळे, तपासी अधिकारी नित्यानंद झा तसेच कोर्ट पैरवी महिला श्रेणीपोउपनि./विद्या नरेश बारे आणि श्रेणीपोउपनि./संजय गावड यांनी कामकाज पाहिले.