पोलादपूर रायगड जिल्हा:(प्रतिनिधी दिनेश चाफळकर) तालुक्यातील कापडे बुद्रुक व परिसरातील विविध ठिकाणी राज्य उत्पादन शुल्क विभागाच्या महाड येथील भरारी पथकाने धाड टाकून सुमारे ३ लाख २५ हजार रुपयांचा गोवा बनावटीच्या दारूचा साठा जप्त केला. या प्रकरणी तीन आरोपींविरुद्ध महाराष्ट्र दारूबंदी कायद्यान्वये गुन्हा दाखल करण्यात आला असून, त्यापैकी एक आरोपी फरार आहे. ही कारवाई शुक्रवार, ७ ऑगस्ट २०२६ रोजी करण्यात आली.
राज्य उत्पादन शुल्क खात्याचे आयुक्त राजेश देशमुख यांच्या आदेशानुसार तसेच संचालक प्रसाद सुर्वे, विभागीय उपआयुक्त प्रदीप पवार आणि रायगडचे राज्य उत्पादन शुल्क अधीक्षक आदित्य पवार यांच्या मार्गदर्शनाखाली ही कारवाई करण्यात आली. या मोहिमेत राज्य उत्पादन शुल्क विभागाचे निरीक्षक सतीश गावडे, दुय्यम निरीक्षक संतोष पिसाळ, बालाजी कांबळे, सहाय्यक दुय्यम निरीक्षक निमेष हार्डिक, मनोज गायकवाड, ज्ञानेश्वर पोटे, सुनील धन, प्रशांत नवले, रंजीत माकोडे, महिला जवान रचना मोहिते तसेच चालक राकेश धुळे व शांतिनाथ पाटील यांनी सहभाग घेतला.
भरारी पथकाने कापडे बुद्रुक गावात छापा टाकून २४ बॉक्स विदेशी मद्य आणि १५ बॉक्स गोवा बनावटीचे देशी मद्य असा एकूण ३ लाख २५ हजार रुपयांचा मुद्देमाल जप्त केला. जप्त करण्यात आलेला मुद्देमाल राज्य उत्पादन शुल्क विभागाच्या महाड कार्यालयात जमा करण्यात आला आहे.
या प्रकरणी विकास कदम व योगेश चीनकर यांच्यासह एकूण तीन आरोपींविरुद्ध महाराष्ट्र दारूबंदी कायद्यान्वये गुन्हा दाखल करण्यात आला असून, त्यापैकी एक आरोपी फरार असल्याची माहिती राज्य उत्पादन शुल्क विभागाने दिली.
याबाबत राज्य उत्पादन शुल्क विभागाचे अधीक्षक आदित्य पवार यांनी सांगितले की, “बेकायदेशीर दारूची विक्री व वाहतूक करणाऱ्यांवर राज्य उत्पादन शुल्क विभागाची कडक नजर असून, अशा बेकायदेशीर प्रकारांवर यापुढेही कठोर कारवाई सुरूच राहील.”
