महाड (प्रतिनिधी दिनेश चाफळकर): महाड शहरात सुरू असल्याचा आरोप असलेल्या अवैध मटका व्यवसायाविरोधात भीमराज सेनेने महाड पोलीस ठाण्यावर धडक मोर्चा काढत प्रशासनाविरोधात तीव्र नाराजी व्यक्त केली. अनेक वेळा लेखी तक्रारी करूनही संबंधितांवर ठोस कारवाई होत नसल्याचा आरोप संघटनेच्या पदाधिकाऱ्यांनी केला. यावेळी पोलीस अधिकाऱ्यांना निवेदन देऊन अवैध धंद्यांवर तातडीने कारवाई करण्याची मागणी करण्यात आली.
भीमराज सेनेच्या म्हणण्यानुसार, महाड शहर पोलीस निरीक्षक, तहसीलदार तसेच उपविभागीय पोलीस अधिकारी यांच्याकडे यापूर्वी अनेक तक्रारी सादर करण्यात आल्या होत्या. मात्र, त्यानंतरही शहरातील विविध भागांत मटका व्यवसाय सुरूच असल्याचा आरोप करण्यात आला. राष्ट्रीय अध्यक्ष राजूभाऊ थाटे, कार्याध्यक्ष आनंदभाऊ सूर्यवंशी, सिद्धार्थ सुरडकर, कोकण प्रदेश सचिव लवेश साळवी आणि रायगड जिल्हा सचिव आदित्य मोहिते यांच्यासह अनेक कार्यकर्ते यावेळी उपस्थित होते.
सुकट गल्ली, छत्रपती शिवाजी महाराज चौक, नातेखिंड आणि वीरेश्वर मंदिर परिसरात अवैध मटका व्यवसाय सुरू असल्याचे सांगत संबंधितांवर कठोर कारवाईची मागणी करण्यात आली. अवैध धंद्यांमुळे युवकांमध्ये व्यसनाधीनता वाढत असून सामाजिक वातावरण बिघडत असल्याची चिंता व्यक्त करण्यात आली.
यावेळी कोकण प्रदेश सचिव लवेश साळवी यांनी अवैध मटका व्यवसायासंदर्भात आणखी काही महत्त्वाचे पुरावे त्यांच्या ताब्यात असल्याचा दावा केला. आवश्यकतेनुसार हे पुरावे प्रशासनाकडे सादर करण्यात येतील, असे त्यांनी सांगितले.
“जे अवैध धंदे नागरिकांना दिसतात, ते प्रशासनाला का दिसत नाहीत?” असा सवाल उपस्थित करत तातडीने कारवाई न झाल्यास तीव्र जनआंदोलन छेडण्याचा इशारा भीमराज सेनेने दिला. या प्रकरणी प्रशासन काय भूमिका घेते याकडे नागरिकांचे लक्ष लागले आहे.
