के.व्ही.टी.आर. सीबीएसई स्कूलमध्ये जागतिक ऑलिम्पिक दिन उत्साहात साजरा

शिरपूर, धुळे (प्रतिनिधी तुषार शेटे): किसान विद्या प्रसारक संस्था शिरपूर संचलित कर्मवीर व्यंकटराव तानाजी रणधीर सीबीएसई स्कूल, शिरपूर येथे जागतिक ऑलिम्पिक दिन मोठ्या उत्साहात आणि क्रीडामय वातावरणात साजरा करण्यात आला. विद्यार्थ्यांमध्ये क्रीडाप्रेम, शिस्त, मैत्री आणि उत्कृष्टतेची भावना रुजविण्याच्या उद्देशाने या कार्यक्रमाचे आयोजन करण्यात आले होते.
कार्यक्रमाच्या अध्यक्षस्थानी शाळेच्या प्राचार्या सौ. सुरेखा मिस्त्री या होत्या. यावेळी उपप्राचार्य विवेक पाटील, समन्वयक सागर वाघ तसेच क्रीडा प्रमुख प्रा. राकेश बोरसे यांची प्रमुख उपस्थिती होती. याशिवाय क्रीडा शिक्षक व प्रशिक्षक विजेंद्र जाधव, नूर तेली, दीपक पवार, नयना माळी, हेमंत शिरसाठ, संजय मोते, भरत मराठे आणि कल्पेश माळी हे उपस्थित होते.
जागतिक ऑलिम्पिक दिनानिमित्त शाळेमध्ये विविध क्रीडा स्पर्धा व उपक्रमांचे आयोजन करण्यात आले. यामध्ये धावणे, रिले रेस, खो-खो, कबड्डी तसेच इतर मैदानी खेळांचा समावेश होता. विद्यार्थ्यांनी या स्पर्धांमध्ये उत्स्फूर्त सहभाग नोंदवत आपली क्रीडा कौशल्ये प्रदर्शित केली. स्पर्धांमुळे विद्यार्थ्यांमध्ये निरोगी स्पर्धात्मकता, संघभावना आणि नेतृत्व गुणांचा विकास होण्यास मदत झाली.
यावेळी विद्यार्थ्यांना ऑलिम्पिक चळवळीचा इतिहास, ऑलिम्पिकची मूल्ये आणि जागतिक स्तरावरील क्रीडा स्पर्धांचे महत्त्व समजावून सांगण्यात आले. “वेगवान, उच्च आणि अधिक मजबूत – एकत्रितपणे” हा ऑलिम्पिकचा संदेश विद्यार्थ्यांपर्यंत पोहोचविण्यात आला.
संपूर्ण कार्यक्रम उत्साहपूर्ण वातावरणात पार पडला. विद्यार्थी, शिक्षक आणि कर्मचाऱ्यांनी मोठ्या संख्येने सहभाग नोंदवून जागतिक ऑलिम्पिक दिनाचा संदेश प्रभावीपणे समाजापर्यंत पोहोचविला. कार्यक्रमाच्या यशस्वी आयोजनाबद्दल उपस्थितांनी शाळेच्या क्रीडा विभागाचे कौतुक केले.